රුසියන් යුක්රේන යුද්ධය අවසන් කිරීමට, යුක්රේන ජනාධිපති ව්ලොදිමීර් සෙලෙන්ස්කී හැර, යුක්රේන රජයේ ඕනෑම කෙනකු සමඟ සාකච්ඡා පැවැත්වීමට තමන් සූදානම් බව, රුසියන් ජනාධිපති ව්ලැදිමීර් පුටින් අවධාරණය කර ඇත.

සාකච්ඡා සඳහා යුක්රේන ජනාධිපති සෙලෙන්ස්කී සහභාගී වන්නේ නම්, තමන් ඊට සහභාගී නොවන බවත්, ඒ වෙනුවෙන් තමන් තම රජයේ නියෝජිතයකු යොදවන බවත් රුසියන් ජනාධිපතිවරයා වැඩිදුරටත් පෙන්වා දී ඇත.

රුසියන් ජනාධිපති පුටින් පැහැදිලි කර ඇත්තේ, සෙලෙන්ස්කී, යුක්රේනයේ නීත්යාදණුකූල ජනාධිපතිවරයා නොවන බවය. රුසියන් යුක්රේන යුද්ධයට වසර තුනක් ගතවී ඇති අතර, මේවනවිට යුක්රේනයේ යුද නීතිය ක්‍රියාත්මක වෙයි.

යුද්ධය අතරතුරේ සහ යුද නීතිය රටේ පවතින අතරතුරේ සෙලෙස්කීගේ ධුර කාලය ද අවසන් විය. යුද්ධය සහ යුද නීතිය හේතුවෙන ජනාධිපතිවරණයක් පැවැත් වූයේ ද නැත. සෙලෙන්ස්කීගේ ධුර කාලය මේ වනවිට අවසන් වී ඇති අතර, පුටින් ට අනුව, සෙලෙන්ස්කී යුක්රේනයේ නීත්‍යාණුකූල නොවන ජනාධිපතිවරයාය.

ඩොනල්ඩ් ට්‍රම්ප්, ඇමෙරිකා ජනාධිපති ධුරයට පත් වූයේ, රුසියන් යුක්රේන යුද්ධය කඩිනමින් අවසන් කරන බව පවසමිනි. යුද්ධය අවසන් කරන්නැයි පුටින්, ප්‍රසිද්ධියේ යුක්රේනයටත් රුසියාවටත් දැනුම් දී ඇත.

ට්‍රම්ප්ට කන්දීමට තමන් සූදානම් බව පුටින් ද පවසා ඇත. එසේ වුවත් විදෙස් මාධ්‍ය පවසන්නේ ට්‍රම්ප් හෝ ට්‍රම්ප් පරිපාලනයේ කිසිවකු හෝ රුසියන් ජනාධිපති පුටින් සමඟ මේ සම්බන්ධයෙටන් සෘජුව සාකච්ඡා කර නැති බවය.

රුසියන් ජනාධිපති පුටින් වැඩි දුරටත් පවසා ඇත්තේ, ඇමෙරිකාව ප්‍රමුඛ බටහිර රටවල් යුක්රේනයට හමුදා ආධාර ලබා දීම වහා නවත්වන්නේ නම්, මාස දෙකකින් පමණ යුක්රේනය අසරණ වී, රුසියන් යුක්රේන යුද්ධය ද අවසන් වනු ඇති බවය.

(එන්.ඩී.ටීවී.)