රජය අපේක්ෂා කරන නව ආර්ථික ප‍්‍රතිසංස්කරණ කි‍්‍රයාත්මක කිරීම අපහසු වී ඇත්තේ තම සභාග රජයට අයත් ඇතැම් පක්ෂවල දළදඬු ප‍්‍රතිපත්ති නිසා යැයි ඉන්දීය අගමැති මන්මෝහන් සිං පෙරේදා (19) පාර්ලිමේන්තුව ඇමැතූ අවස්ථාවේදී ප‍්‍රකාශ කළේය. අගමැති සිංගේ එම ප‍්‍රකාශය, ඉකුත් ඉරිදා (18) ඉන්දීය දුම්රිය සේවා ඇමැති දිනේෂ් ති‍්‍රවේදි ඉල්ලා අස්වීමේ සිද්ධියට ප‍්‍රතිචාර දැක්වීමකි. ති‍්‍රවේදි, ඉන්දියාවේ කුඩා පක්ෂයක් වන තෘණමූල පක්ෂයේ මන්තී‍්‍රවරයෙකි. බටහිර බෙංගාල මහ ඇමැතිනී මම්තා බෙනර්ජිගේ නායකත්වයෙන් යුත් තෘණමූල පක්ෂය ඉන්දීය සභාග රජයේ කොටස්කරුවෙක් ද වේ. සභාග රජයේ සියලූම පක්ෂවලට පිළිගත හැකි අයුරින් ආර්ථික ප‍්‍රතිපත්ති සකස් කළ යුතු යැයි පැවැසූ අගමැති සිං වැඩි දුරටත් කියා සිටියේ දුම්රිය සේවය පිළිබඳ අයවැය සකස් කිරීමේදී හටගත් මතභේද නිසා ඇමැති ති‍්‍රවේදි ඉල්ලා අස්වූ බවය. ඉන්දීය රජය, භාණ්ඩ මිල සහ දුම්රිය ගාස්තු වැඩි කිරීම දුප්පතාට එරෙහි වීමක් යැයි මම්තා බෙනර්ජි පවසා ඇති අතර තෘණමූල පක්ෂයේ ද බෙදීමක් හට ගෙන ඇතැයි වාර්තා වේ. ති‍්‍රවේදි ඇමැති ධුරයෙන් ඉල්ලා අස් වීමට තීරණය කර ඇත්තේ ද බෙනර්ජිගේ ඉල්ලීම සැලකිල්ලට ගනිමිනි. කෙසේ නමුත් ති‍්‍රවේදිගේ ඉල්ලා අස් වීම ඉතා කනගාටුවෙන් බාරගත් බව ද අගමැති සිං වැඩි දුරටත් කියා සිටියේය. ආසියාවේ දෙවැනි විශාලතම ආර්ථික බලවතා වන්නේ ඉන්දියාවය. ඉන්දියාවේ නව ආර්ථික ප‍්‍රතිසංස්කරණවලට සහාය දෙන්නැයි අගමැතිවරයා පක්ෂ විපක්ෂ සියල්ලන්ගෙන්ම ඉල්ලීමක් ද කළේය. පටු අදහස් පසෙකලා ජාතියක් වශයෙන් සියල්ලන්ම එකමුතු වීමට කාලය එළැඹ ඇතැයි ද අගමැති සිං අවධාරණය කළේය.