මේ දිනවල ආදායම් වාර්තා බිඳ දමමින් තිරගතවන 'පුෂ්පා 2' චිත්‍රපටයේ පුෂ්ප රාජ්ගේ චරිතයට පණ දෙන ප්‍රධාන නළු අල්ලු අර්ජුන් අත්අඩංගුවට ගෙන ඇතැයි වාර්තා වේ.

ජනප්‍රිය නළු අල්ලු අර්ජුන් අත්අඩංගුවට ගෙන ඇත්තේ හයිද්‍රාබාද් සන්ධ්‍යා සිනමාහලේදී 39 හැවිරිදි රේවතී නමැති කාන්තාවක මියයෑමේ සිද්ධියක් සම්බන්ධයෙනි.

මෙම කාන්තාව ඇගේ පුතා සහ සැමියා ද සමඟ සන්ධ්‍යා සිනමාහලට ගොස් ඇත්තේ 'පුෂ්පා 2' චිත්‍රපටය නැරැඹීමටය.

අල්ලු අර්ජුන් ද සිනමාහලට පැමිණ ඇති අතර, සිනහලේ සිටි පිරිස් පොරකමින් සහ තෙරපෙමින් ඔහු දැක ගැනීමට එක් රොක් වී ඇත. එම තෙරපීමෙන් රේවතී මියගිය අතර ඇගේ පුතා තුවාල ලැබුවේය.‍‍

සිනමාහලේ තෙරපීම සිදුවූයේ අල්ලු අර්ජුන් සහ ඔහුගේ කණ්ඩායම නොසැලකිලිමත්ව කටයුතු කිරීම සහ නිසි ලෙස පිරිස් කළමණාකරනය නොකිරීම නිසා යැයි චෝදනා එල්ල වී ඇත.