රටේ ආරක්ෂාවට තර්ජනයක් වන අන්දමේ ලියකියවිලි ගඩාෆි පුතු සෙයිෆ් අල් ඉස්ලාම්ට දීමට උත්සාහ ගත් ජාත්‍යන්තර අපරාධ අධිකරණයේ නීතීඥවරියක අත්අඩංගුවට ගැනීමට ලිබියා නව රජය ඊයේ (10) කටයුතු කළේය. අත්අඩංගුවට ගෙන ඇත්තේ මෙලින්ඩා ටේලර් නමැති  ඕස්ටේ‍්‍රලියා ජාතික නීතීඥවරියයි. ඇය සහ ජාත්‍යන්තර අපරාධ අධිකරණයේ තවත් නීතීඥයන් පිරිසක් මීට දින කීපයකට පෙර ලිබියාවට පැමිණ ඇත්තේ ලිබියා රජයේ අත්අඩංගුවේ පසුවන ගඩාෆි පුතු සෙයිෆ් අල් ඉස්ලාම් හමුවීමේ අරමුණින්ය. නීතීඥ කණ්ඩායම ඊයේ ලිබියාවේ බටහිරින් පිහිටි සින්ටානා නගරයට ගොස් ඇත. ඉකුත් වසරේ නොවැම්බර් මාසයේ ලිබියාවෙන් පලා යෑමට උත්සාහ කළ අවස්ථාවේදී අල්ලා ගැනීමෙන් පසු සෙයිෆ් අල් ඉස්ලාම් රඳවා තැබෙන්නේ සින්ටානා නගරයේය. ”ජාත්‍යන්තර අපරාධ අධිකරණයේ නීතීඥ කණ්ඩාම සින්ටානා බන්ධනාගාරයේ දී සෙයිෆ් අල් ඉස්ලාම් හමුවුණා. එම අවස්ථාවේදී මෙලින්ඩා ටේලර් නමැති නීතීඥවරිය ලිබියා රජයේ අනුදැනුමකින් තොරව අල් ඉස්ලාම්ට කිසියම් ලියකියවිලි වගයක් දීමට උත්සාහ කළා. ආරක්ෂක අංශ ඇය අත්අඩංගුවට ගෙන තිබෙනවා” යැයි ලිබියා රජය වෙනුවෙන් පෙනී සිටින නීතීඥ අහ්මඞ් අල් ජෙහායි පවසයි. ලිබියා රජයත් ජාත්‍යන්තර අපරාධ අධිකරණයත් අතර සම්බන්ධීකරණ කටයුතු සිදු කරනු ලබන්නේ අහ්මඞ් අල් ජෙහායි විසිනි. වසර 42 ක් තිස්සේ ලිබියාව පාලනය කළ ගඩාෆිගෙන් පසු රටේ බලය හිමිවීමට නියමිතව තිබුණේ සෙයිෆ් අල් ඉස්ලාම්ටය. ගඩාෆිගේ දු දරුවන් අතරින් දේශපාලනයට පිවිස සිටින්නේ ද ඔහුය. ඉකත් වසරේ ගඩාෆිගේ පාලනයට එරෙහි විරෝධතා ආරම්භ වූ අවස්ථාවේදී විරෝධතාකරුවන් නිර්දය ලෙස ඝාතනය කිරීමට අණ දීමෙන් මනුෂ්‍යත්වයට එරෙහි අපරාධ සිදු කළේ යැයි ජාත්‍යන්තර අපරාධ අධිකරණයද සෙයිෆ් අල් ඉස්ලාම්ට චෝදනා එල්ල කර තිබේ. ලිබියා කැරැුලිකරුවන් අල් ඉස්ලාම් අල්ලා ගත් අවස්ථාවේදී ජාත්‍යන්තර අපරාධ අධිකරණ ලිබියා නව රජයෙන් ඉල්ලා සිටියේ සෙයිෆ් අල් ඉස්ලාම් තමන්ට බාර දෙන ලෙසටය. ඊට විරෝධය පළකරමින් ලිබියා රජය කියා සිටියේ ලිබියාවේ පවතින නීතියට අනුව සෙයිෆ් අල් ඉස්ලාම්ට ලිබියාවේදී දඬුවම් ලබා දීමට කටයුතු කරන බවය. කෙසේ නමුත් ලිබියා නව රජය තවමත් අල් ඉස්ලාම්ට එරෙහිව නඩු විභාගයක් පවත්වා නැත. බන්ධනාගාරයේදී අල් ඉස්ලාම් නිරන්තරයෙන් වධ බන්ධනයන්ට ලක් වන බව ජාත්‍යන්තර අපරාධ අධිකරණයට පැමිණිලි ලැබී ඇතැයිද වාර්තා වෙයි.