ලෝක බලවතුන් ඉරානය සමඟ න්‍යෂ්ටික සාකච්ඡා පැවැත්වෙද්දී එරටට ප‍්‍රහාරයක් එල්ල කිරීමෙන් වැළැකී සිටින්නට තමන් ඇමෙරිකාවට පොරොන්දුවක් දී නැතැයි ඊශ‍්‍රායල ආරක්ෂක ඇමැති එහුඞ් බැරැක් පවසයි. ඊශ‍්‍රායලය දිගින් දිගටම කියා සිටින්නේ ඉරානය ලොවට තර්ජනයක් බවත් ලෝකයට ත‍්‍රස්තවාදය පතුරුවන බවත්ය. ඉරානය පරමාණු බෝම්බ නිපදවන බවට ඊශ‍්‍රායලය ද නිරන්තරයෙන් චෝදනා කරයි. ඊශ‍්‍රායල රජය තරයේ කියා සිටින්නේ ඉරානය මට්ටු කිරීමට නම් ප‍්‍රහාරයක් එල්ල කළ යුතු බවය. එහෙත් ඇමෙරිකාව ඊශ‍්‍රායලයෙන් ඉල්ලා ඇත්තේ සම්බාධක පනවා ඉරානය මට්ටු කිරීමට ඉඩ දෙන ලෙසටය. ඉරාන න්‍යෂ්ටික අර්බුදය විසඳිය හැක්කේ සාකච්ඡා මාර්ගයෙන් පමණක් යැයි ද ඇමෙරිකාව විශ්වාස කරයි. මේ හේතුව නිසා ඉකුත් සඳුදා (16 වැනිදා) ඇමෙරිකන්, චීන, රුසියා, බි‍්‍රතාන්‍ය, ප‍්‍රංශ සහ ජර්මන් නියෝජිතයන් සහ ඉරාන නියෝජිතයන් අතර ඉස්තාම්බුල් නුවරදී සාකච්ඡා වටයක් පැවැත්විණි. ඉරානය ප‍්‍රකාශ කළේ සාකච්ඡා මාර්ගයෙන් හටගෙන ඇති අර්බුදය විසඳීමට හැකිවේවි යැයි තමන් විශ්වාස කරන බවය. සාකච්ඡාවල දෙවැනි වටය ලබන සතියේදී පැවැත්වීමට නියමිත යැයි ද වාර්තා වේ.