මතභේදයට තුඩු දී ඇති ඊජිප්තුවේ නව ව්‍යවස්ථාව සම්බන්ධයෙන් ජනමත විචාරණයක් පැවැත්වීමට තමා තීරණය කළ බව එරට ජනපති මොහොමඞ් මොර්සි ඊයේ(2) ප‍්‍රකාශ කළේය. ඒ අනුව ජනමත චිචාරණය එළඹෙන 15 දා පැවැත්වීමට නියමිතය. එහිදී ජනාධිපති මොර්ස් පසුගියදා තමා වෙත පවරාගත් අසීමිත බලතල පිළිබඳව ජනතා අදහස් විමසනු ඇත. ජනපති මොර්සි ඉකුත් මාසයේදී විපක්ෂ විරෝධතා මැද අධිකරණය අභිබවා තමන්ට තීරණ ගැනීමේ හැකියාව ලබාදෙන විශේෂ බලතල තමන් යටතට පවරා ගත්තේය. අනතුරුව ඊට අදාළව ව්‍යවස්ථාවක් ද කෙටුම්පත් කෙරුණු අතර එය සම්මත කර ගැනීමට එරට රජය කටයුතු කරමින් සිටී. ජනපති මොර්සි ගත් කි‍්‍රයාමාර්ගයට විරෝධය පළ කරමින් දහස් ගණන් විපක්ෂ කි‍්‍රයාකාරීන් ඉකුත් සිකුරාදා කයිරෝ අගනුවර තහීර් චතුරස‍්‍රයට රැුස්ව විරෝධතා පෙළපාළි ගිය අතර පොලිසිය යොදවා එම පිරිස් මර්දනය කිරීමට එරට රජය කි‍්‍රයා කළේය. ඊට ප‍්‍රතිචාර දක්වමින් ජනපති මොර්සිගේ ආධාරකරුවෝ දහස් ගණනක් ඊයේ(2) කයිරෝ නුවරට රැස්ව තම නායකයාට සහාය පළ කරමින් පෙළපාළි ගියහ. මේ අතර ජනාධිපතිවරයාගේ බලතල පවරා ගැනීමට විරෝධය පළ කරමින් එරට නීතීඥවරුන් ද පසුගිය සතියේ වැඩවර්ජනයක නිරත වූහ. විනිසුරුවරුන් එක හඬින් කියා සිටින්නට වූයේ ජනපති මොර්සිගේ නව රජය බලයෙන් ඉවත් විය යුතුයි කියාය. ඉකුත් වසරේදී දිගු කලක් ඊජිප්තුව පාලනය කළ ජනපති හොස්නි මුබාරක්ගේ පාලනය පෙරළා දැමීමට කටයුතු කළේද වත්මන් ජනපති මොර්සි ප‍්‍රමුඛ මුස්ලිම් සහෝදරත්ව පක්ෂයයි.