තුර්කිය යළිත් වරක් ප‍්‍රබල භූමිකම්පාවකින් ඊයේ (10) කැළැඹී ගියේය. එයින් පුද්ගලයෝ හත් දෙනෙක් ජීවිතක්ෂයට පත්වූහ. භූමිකම්පාවෙන් කඩා වැටුණු නිවාස සහ ගොඩනැගිලි අතර සිරවුණු 23 දෙනකු බේරා ගැනීමට සහන සේවකයෝ සමත් වූහ.භූමි කම්පාවෙන් බලපෑම් එල්ල වුණේ නැගෙනහිර තුර්කියේ වෑන් නුවරටය. නගරයේ ගොඩනැගිලි තුනක් මුළුමනින්ම බිමට සමතලා වී ඇති අතර නිවාස රැසක් ද සම්පූර්ණයෙන්ම විනාශ විය.භූමි කම්පාව හට ගැනීමත් සමඟ සහන සේවකයන් වහා කි‍්‍රයාත්මක වී සුන්බුන් අතර සිරවූවන් සෙවීමේ මෙහෙයුම් ආරම්භ කෙරුණු අතර 23 දෙනකුගේ ජීවිත බේරා ගැනීමට ඔවුහු සමත් වූහ. විදෙස් පුවත් සේවා මුලින් වාර්තා කළේ භූමි කම්පාවේ ප‍්‍රබලත්වය රික්ටර් මාපක ඒකක 7.2 ක් බවය. එහෙත් එය ප‍්‍රබලත්වය ඒකක 5.2 ක් යැයි පසුව නිවේදනය කෙරුණි. ඉකුත් ඔක්තෝබර් 26 වැනිදා ද තුර්කිය, ප‍්‍රබල භූමිකම්පාවකින් කැළැඹී ගිය අතර එයින් 600 දෙනෙක් ජීවිතක්ෂයට පත්වූහ. එම භූමි කම්පාවෙන් උන්හිටිතැන් අහිමි වූවන් තවමත් තාවකාලික කූඩාරම්වල රැඳී සිටන අතර ඊයේ සිදුවූ භූමි කම්පාවත් සමඟ එම පිරිස තවත් අපහසුවට පත් වූ බව තුර්කි නියෝජ්‍ය අගමැති බෙසීර් අටාලේ පවසයි.භූ කම්පන විද්‍යාඥයන් පවසන්නේ ඊයේ හටගත් භූමිකම්පාව ඉකුත් ඔක්තෝබර් මාසයේ සිදුවූ භූමි කම්පාවේ පසු කම්පනයක් බවයි.සුන්බුන් අතර සිරවූවන් සෙවීමේ මෙහෙයුම් දිගටම සිදු කෙරමින් පවතින බවත් මරණ සංඛ්‍යාව තවත් ඉහළ යා හැකි බවත් සහන සේවකයෝ පවසති.