ප්‍රංශ ජනාධිපති ඉමැනුවෙල් මැක්රොන්, එරට අග්‍රාමාත්‍ය ධුරයට ෆ්‍රන්සුවා බවුරෝ නම් කර ඇත. 73 හැවිරිදි ෆ්‍රන්සුවා බවුරෝ කෘතහස්ථ දේශපාලනඥයෙකි. 

ප්‍රංශයේ මහ මැතිවරණය පැවැත්වූයේ මීට මාස 6 කට පෙරය. එයින් පාර්ලිමේන්තුවේ බහුතරය දිනා ගත්තේ දක්ෂිණාංශික දේශපාලන කණ්ඩායම්ය. 

මැක්රොන් විසින් මීට පෙර අග්‍රාමාත්‍ය ධුරයට පත් කරනු ලැබූ මයිකල් බානියේ පසුගිය දා විශ්වාසභංගයකින් ඉවත් කෙරුණි. මෑත ඉතිහාසයේ අඩුම කාලයක් ප්‍රංශ අග්‍රාමාත්‍ය ධුරයේ දැරූ පුද්ගලයා වන්නේ, මයිකල් බානියේය. 

බානියේට එරෙහිව පාර්ලිමේන්තුවට විශ්වාසභංගයක් ගෙන ඒම සිදුවූයේ ඔහු අයවැය පරතරය අඩු කිරීමේ අරමුණ ඇතිව සිදු කළ කප්පාදු ජනතා අප්‍රසාදයට හේතුවක් වීම නිසාය. මැක්රොන් නව අග්‍රාමාත්‍යවරයා ලෙස ෆ්‍රන්සුවා බවුරෝ නම් කළේ ඉන් අනතුරුවය. 

මැක්රොන්ට ද ජනාධිපති ධුරයෙන් ඉවත් වන්නැයි විපක්ෂ දේශපාලන කණ්ඩායම් බලපෑම් කරයි. කෙසේ නමුත්, පස් අවුරුදු ජනාධිපති ධුර කාලය අවසන් වෙන තුරු තමන් ජනාධිපති ධුරයේ රැඳී සිටින බව ප්‍රංශ ජනාධිපති ඉමැනුවෙල් මැක්රොන් අවධාරණය කර ඇත. මැක්රොන්ගේ ජනාධිපති ධුරය අවසන් වෙන්නේ 2027 දීය.