සුපිරි බොලිවුඩ් නළු සල්මන් ඛාන්ගේ නිවසට වෙඩිතැබීමේ සිද්ධිය සම්බන්ධයෙන් එරට පොලීසිය සැකපිට පුද්ගලයන් දෙදෙනෙකු අත්අඩංගුවට ගෙන ඇතැයි ඉන්දීය මාධ්‍ය පවසයි.

අත්අඩංගුවට ගෙන ඇත්තේ විකී සහබ් සහ සාගර් ශ්‍රීජෝගේන්ද්‍ර නමැති දෙදෙනාය. ගුජරාට ප්‍රාන්තයේ භූජ් විහාරයක සැඟව සිටියදී මොවුන් දෙදෙනා අත්අඩංගුවට ගෙන ඇති බව එම වාර්තා වැඩිදුරටත් සඳහන් කරයි.

ඔවුන් බිෂ්නෝයි නමැති අපරාධ කල්ලියට සම්බන්ධ බවට සැකපළ කරන බව විදෙස් මාධ්‍ය වැඩිදුරටත් වාර්තා කර තිබේ. පසුගිය14 වැනිදා අලුයම 5 ට පමණ යතුරුපැදියකින් පැමිණි සැකකරුවන් විසින් මුම්බායි හි පිහිටි සල්මන් ඛාන්ගේ නිවසට වෙඩි තබා පළාගොස් තිබුණි.

මෙම වෙඩි ප්‍රහාරයත් සමග සල්මන්ගේ ආරක්ෂාව තර කිරීමට එරට ආරක්ෂක අංශ පියවර ගෙන තිබූ අතර නිවසින් පිටව යන්නේ නම් ඒ පිළිබඳව පොලීසිය දැනුවත් කරන ලෙසට ද දැනුම්දී තිබුණි.

ඉන්දීය මාධ්‍ය වාර්තා කළේ, මරණ තර්ජන හේතුවෙන් සල්මන් ඛාන් හට අත්‍යවශ්‍ය කටයුතුවලට හැර සිය නිවසින් පිටතට නොයන ලෙසද ආරක්ෂක අංශ දැනුම්දී ඇති බවය.

ඉන්දියාවේ ප්‍රසිද්ධ චරිත කිහිපයක ඝාතන සිද්ධීන්වලට චෝදනා එල්ලවී සිටින කුප්‍රකට බිෂ්නෝයි කල්ලිය මීට පෙර ද සල්මන්ට තර්ජනය කර තිබුණි.