ස්වීඩනය ‘නේටෝ’ සාමාජිකයකු වීම දැකගන්න තමන් නොඉවසිල්ලෙන් බලා සිටින බව, ඇමෙරිකන් ජනාධිපති ජෝ බයිඩන් පවසයි. ඇමෙරිකන් ජනාධිපතිවරයා මෙසේ පැවැසුවේ, ධවල මන්දිරයට ආ ස්වීඩන අග්‍රාමාත්‍ය උල්ෆ් ක්‍රිස්ටෝර්සන් හමුවී ඔහු සමඟ සාකච්ඡා කරද්දීය.

ස්වීඩනය යුරෝපා රාජ්‍යයකි. ස්වීඩනය මෙන්ම ෆින්ලන්තය ද මේ වනවිට ‘නේටෝ’ හෙවත් උතුරු අත්ලාන්තික් ගිවිසුම් සංවිධානයේ සාමාජිකත්වය වෙනුවෙන් ඇයදුම්පත් යොමු කර තිබේ.

ස්වීඩනය සහ ෆින්ලන්තය මෙසේ ‘නේටෝ’ සංවිධානයේ සාමාජිකත්වය ඉල්ලා ඇත්තේ රුසියාව යුක්රේනයට එරෙහිව ගත් හමුදාමය ක්‍රියා මාර්ගය සම්බන්ධයෙන් බිය පළ කරමිණි.

‘නේටෝ’ යනු රුසියාවෙන් එල්ල වන තර්ජන පිටුදැකීමේ අරමුණින්, ඇමෙරිකාව ඇතුළු යුරෝපා රටවල් එක් වී පිහිටුවා ගත් යුද සන්ධානයයි.

ෆින්ලන්තයට මෙන් නොව, ස්වීඩනයට ‘නේටෝ’ සාමාජිකත්වය ලබා ගැනීමේ දී ගැටලුවක් පවතී. ස්වීඩනයට ‘නේටෝ’ සාමාජිකත්වය ලබා ගැනීමට නම්, තුර්කියේ අනුමැතිය අවශ්‍ය වෙයි. තුර්කිය ද ‘නේටෝ’ සාමාජිකයෙකි.

රුසියාව සමඟ යහපත් සබඳතා පවත්වන එකම ‘නේටෝ’ සාමාජිකයා තුර්කියයි. තුර්කි රජයට එරෙහි විපක්ෂ ක්‍රියාකාරීන් බොහෝ දෙනකුට ස්වීඩනය රැකවරණය දෙයි. තුර්කිය ස්වීඩනයට විරෝධය දක්වන්නේ මේ නිසාය.

ලබන සතියේ ලිතුවේනියාවේ දී ‘නේටෝ’ සමුළුවක් පැවැත්වෙයි. එහිදී තුර්කිය ස්වීඩනය සම්බන්ධයෙන් ගන්නා තීරණය නිවේදනය කෙරෙනු ඇත.

ස්වීඩන අග්‍රාමාත්‍ය උල්ෆ් ක්‍රිස්ටෝර්සන් උණුසුම් ලෙස පිළිගත් ඇමෙරිකන් ජනාධිපති බයිඩන්, රුසියන් යුක්රේන අර්බුදය සම්බන්ධයෙන් ද සාකච්ඡා පැවැත්වීය.

‘නේටෝ’ සාමාජිකයකු වීමට ස්වීඩනයට අවශ්‍ය සම්පූර්ණ සහාය ඇමෙරිකාවෙන් ලැබෙනු ඇතැයි ඇමෙරිකන් ජනාධිපති ජෝ බයිඩන් ස්වීඩන අග්‍රාමාත්‍යවරයා හමුවේ පැහැදිලි කළේය. ඇමෙරිකාව සහ ස්වීඩනය අතර ද්වීපාර්ශ්වීක සබඳතා ශක්තිමත් කර ගැනීම සම්බන්ධයෙන් ද සාකච්ඡා පැවැත්විණි.