(ඩයනා උදයංගනී)
දින කිහිපයක් තිස්සේ පැවති තද වැසි හා සුළං හේතුවෙන් දිවයිනේ දිස්ත්‍රික්ක 10 කට බලපෑ ආපදා තත්වයෙන් පවුල් 12,177 කට අයත්, 48,300 දෙනෙක් පීඩාවට පත්ව ඇතැයි ආපදා කළමනාකරණය මධ්‍යස්ථානය පවසයි.
පීඩාවට පත් පවුල් 243 කට අයත් 1,037 දෙනකු ආරක්‍ෂිත ස්ථාන 25 ක රඳවා සිටින බව ද එම මධ්‍යස්ථානය සඳහන් කරයි.
මෙම ආපදා තත්වයන් මේ වන විට මේ ක්‍රමයෙන් පහව යමින් තිබෙන අතර ජල ගැලීම් පැවති බොහෝ ස්ථානවල ජලය මේ වන විට බැස යමින් ඇතැයි එම මධ්‍යස්ථානයේ සහකාර අධ්‍යක්‍ෂ (මාධ්‍ය) ප්‍රදීප් කොඩිප්පිලි මහතා පැවසීය.
මෙම ආපදා තත්වයෙන් මරණ 5 ක් ද වාර්තා වූ අතර තවත් තිදෙනෙක් තුවාල ලැබූහ.
කෑගල්ල, ගම්පහ, කොළඹ, කළුතර, ගාල්ල, මාතර, කුරුණෑගල, පුත්තලම, රත්නපුර සහ මහනුවර දිස්ත්‍රික්කයන්හි ජනතාව මෙම වැසි සහ සුළං සහිත කාලගුණ තත්ත්වයෙන් පීඩාවට පත්වූ අතර ඉන් වැඩිම බලපෑමක් ඇතිවූයේ ගම්පහ දිස්ත්‍රික්කයටය.
ගම්පහ දිස්ත්‍රික්කයේ කැලණිය, අත්තනගල්ල, වත්තල, මහර, දිවුලපිටිය, මිනුවන්ගොඩ, මීරිගම, දොම්පෙ, බියගම, මීගමුව, ගම්පහ සහ කටාන ප්‍රාදේශීය ලේකම් කොට්ඨාශයන්ට බලපෑ ජලගැලීම් තත්වය හේතුවෙන් පමුල් 8,914 කට අයත් 36,390 දෙනෙක් පීඩාවට පත්වූහ. මෙම තත්ත්වය හේතුවෙන් නිවාස තුනක් සම්පූර්ණයෙන් විනාශ වී ඇති අතර තවත් නිවාස 868 කට අර්ධ හානි සිදුව ඇත.
නිවාස හානි වෙනුවෙන් තක්සේරු වාර්තා අනුව වන්දි ගෙවීමට කටයුතු කරගෙන යන බව ද කොඩිප්පිලි මහතා පැවසීය.
අවතැන් වූ පිරිස් වෙත සහන සැලසීම දිස්ත්‍රික් හා ප්‍රාදේශීය ලේකම් කාර්යාල සහ ආපදා කළමනාකරණ කණ්ඩායම් හරහා කරගෙන යන බව ද කොඩිප්පිලි මහතා සඳහන් කළේය.
පාදුක්ක ආටිගල ප්‍රදේශය ජලයෙන් යටවී ඇති අයුරු පාදුක්ක නිහාල් වෙත්තසිංහ
හිනිදුම නගරය ජලයෙන් යටවී ඇති අයරු- උඩුගම රවි ලියනගේ
මීගහවත් ප්‍රදේශයේ ජලයෙන් වැස්සෙන් වූ හානිය - මීගහවත්ත ප්‍රේමතිල පෙරමුණ
පල්ලේවෙල මාර්ග ජලයෙන් යටවී ඇති අයුරු - පුෂ්පකුමාර මල්ලවාරච්චි
ගම්පහ නගරය ජලයෙන් යටවී ඇති අයුරු - තිලකරත්න දිසානායක
ගනේමුල්ල - ගම්පහ පාර ජලයෙන් යටවී ඇති අයුරු මාකේවිට අර්නස් ජයතිලක
