ශ්‍රී ලංකාව සහ දකුණු අප්‍රිකාව අතර මහනුවර පල්ලෙකැළේ ක්‍රීඩාංගණයේදී අද (5 වැනිදා) පැවැති එක්දින තරගයේදී ශ්‍රී ලංකා පිලට අත්වූයේ ලකුණු 78 ක ඛේදජනක පරාජයකි. තරගය පරාජය වීමට යන බව දුටු ඇතැම් ප්‍රේක්ෂකයන් ශ්‍රී ලංකා ඉනිමේ 40 වැනි ඕවරය ආරම්භ වීමටත් පෙර ක්‍රීඩාංගණයෙන් ඉවත්ව ගියද තවත් පිරිසක් අවසන් පන්දුව දක්වාම ක්‍රීඩාංගණයේ රැඳී සිටිමින් ශ්‍රී ලංකා කණ්ඩායම වෙනුවෙන් සටන ගෙන ගිය පිතිකරුවන්ට අත්පොළසන් දුන්හ.
තරගයේ අවසන් පන්දුව යවන තුරුත් ක්‍රීඩාංගණයේ සිටි අය අතුරින් අග්නිදිග විශ්ව විද්‍යාලයේ සිසුහු පිරිසක් තමන් සිටි පෙදෙසේ කැළි කසල සියල්ල එක තැනකට එකතු කරමින් නරඹන්නන්ගේ පෙදෙස පිරිසිදු කළහ. පළමුව පිටියේ එක් අන්තයක (බස්නාහිර කොටසේ) එය ආරම්භ වූ අතර පසුව නැගෙණහිර කොටසේ සිටි සාමාන්‍ය නරඹන්නෝද තමන් අවට තිබූ කැලි කසළ, හිස් වතුර බෝතල සහ ප්ලාස්ටික් රඳවනයන් එකතු කර එක තැනකට ගෙනැවිත් දැම්මේ ක්‍රීඩාංගණය පිරිසිදු කරන්නන්ගේ කාර්යය ඉතාමත් පහසු කරමිනි.
පසුගියදා රුසියාවේදී පැවැති ලෝක කුසලාන පාපන්දු තරගාවලියේදී පිළිමළුන් පිටුදැකීමේ වටයේ තරගයක් පරාජය වූ ජපාන පාපන්දු කණ්ඩායමද ක්‍රීඩා පිටියෙන් ඉවත්ව යාමට පෙර තමන්ගේ ක්‍රීඩාගාරය සම්පූර්ණයෙන්ම පිරිසිදු කළ හෙයින් රුසියානුවන්ගේ මහත් ආදර ගෞරවයට පාත්‍ර විය.
ඡායාරූප - ඉෂාර එස්. කොඩිකාර
