(අංජුල මහික වීරරත්න)
ඇමෙරිකාව වැනි දියුණු රටවල තාක්ෂණික ක්රම ආදර්ශයට ගනිමින් මෙරට තිබෙන පහසුකම් ද ප‍්‍රයෝජනයට ගෙන ශ්‍රී ලංකාව දියුණු සෞඛ්‍ය පහසුකම් සපයන රටක් බවට කරන බව අග‍්‍රාමාත්‍ය රනිල් වික‍්‍රමසිංහ මහතා ඉකුත්දා (10) පැවැසීය.
අග‍්‍රාමාත්‍යවරයා එසේ පැවසුවේ ඇමෙරිකාවේදී ලෝක සාගර සමුළුවට සහ වෛද්‍ය පරීක්‍ෂණ කීපයකට සහභාගි වී ආපසු දිවයිනට පැමිණි අවස්ථාවේදී තමා පිළිගැනීමට ගුවන් තොටුපොළට පැමිණ සිටි මැති ඇමැතිවරුන් හමුවේ අදහස් දක්වමිනි.
‘‘සෑම රෝගයක් සඳහාම වෙන්වූ වෙනම රෝහලක් බැගින් නිව්යෝර්ක් නුවර පිහිටුවා ඇති බව කී අග‍්‍රාමාත්‍ය රනිල් වික‍්‍රමසිංහ මහතා එවැනි දියුණු සෞඛ්‍ය පහසුකම් ශ්‍රී ලංකාවේද ඇති කිරීම සඳහා අදහසක් ගත යුතුව ඇතැයිද කීය.
‘‘බොහෝ ගම්බද රෝහල්වල විශේෂඥ වෛද්‍ය පහසුකම් අවම හෙයින් සියලූම රටවාසීන්ට සමාන සෞඛ්‍ය පහසුකම් දීම සඳහා දියුණු රටවල තත්ත්වයට ශ්‍රී ලංකාවේ රෝහල් පද්ධතිය ශක්තිමත් කිරීම තම අරමුණ බවද අග‍්‍රාමාත්‍ය රනිල් වික‍්‍රමසිංහ මහතා සඳහන් කළේය.
නිව්යෝර්ක් නුවරදී එක්සත් ජාතීන්ගේ සාගර සම්පත් සමුළුව ඇමතීමෙන් පසුව එක්සත් ජාතීන්ගේ මහ ලේකම් ඇන්තෝනියෝ ගුටරේට්ස් සහ පොදු රාජ්‍ය මණ්ඩල මහ ලේකම් පැටීෂියා ස්කොට්ලන්ඞ් යන මහත්ම මහත්මීන් ඇතුළු ඉහළ පෙළෙහි නිලධාරීන් හමුවී සාකච්ඡා කළ බවත්, ශ්‍රී ලංකාවේ වත්මන් සංහිඳියා සහ ප‍්‍රජාතන්ත‍්‍රවාදය ශක්තිමත් කිරීමේ ක‍්‍රියාවලිය ඔවුන්ගේ ප‍්‍රශංසාවට ලක්වූ බවත් අග‍්‍රාමාත්‍ය රනිල් වික‍්‍රමසිංහ මහතා අමාත්‍යවරුන් හමුවේ පැවැසීය.
අග‍්‍රාමාත්‍ය රනිල් වික‍්‍රමසිංහ මහතා පිළිගැනීමේ අවස්ථාවට වැඩම කර සිටි නුගේගොඩ නාලන්දාරාමාධිපති තිනියාවල පාලිත හිමියෝ සෙත් පිරිත් සජ්ඣායනා කර පිරිත් නූල් ගැට ගැසූහ.
අග‍්‍රාමාත්‍ය රනිල් වික‍්‍රමසිංහ මහතා පිළිගැනීමේ අවස්ථාවට රවි කරුණානායක, ලක්ෂ්මන් කිරිඇල්ල වජිර අබේවර්ධන, ඞී.එම්. ස්වාමිනාදන්, තිලක් මාරපන, ෆීල්ඞ් මාර්ෂල් සරත් ෆොන්සේකා, සාගල රත්නායක, අකිල විරාජ්, දොස්තර කාවින්ද ජයවර්ධන යන අමාත්‍යවරු මන්ත‍්‍රීවරු ඇතුළු පිරිසක් සහභාගිවී සිටියහ.
