විධායක බලතල ඇති අගමැතිවරයකු සහ ජනාධිපතිවරයකු සිටිනවිට ඇමැති සංශෝධනයක් නොව කිසිවක් කර ගැනීමට නොහැකි තත්ත්වයට ගැටලූ ඇතිවීම සම්බන්ධයෙන් පුදුම විය යුතු නැති බව හිටපු ජනාධිපති මහින්ද රාජපක්ෂ මහතා පැවසීය.
හලාවත - මාදම්පේ ප‍්‍රදේශයට පෞද්ගලික කටයුත්තක් සඳහා පෙරේදා 21 වැනිදා පැමිණි අවස්ථාවේදී මාධ්‍යවේදීන් හමුවේ වැඩිදුරටත් අදහස් දැක්වූ හිටපු ජනාධිපති මහින්ද රාජපක්ෂ මහතා මෙසේද පැවසීය.
රටේ ජනතාවට කියන්න තියෙන්නේ මේ ආණ්ඩුව අස්ථාවර එකක් කියලයි. තුනෙන් දෙකක බලයක් ලබාගෙන තිබෙන්නේ ඒ අයට හිතවත් පක්ෂවලට විවිධ දේවල් දීලයි. ඒත් රට තුළ අස්ථාවර ආණ්ඩුවක් තියෙන්නේ කියන එක පැහැදිලියි.
ඇමැති මණ්ඩලය සංශෝධනය කිරීම ජනාධිපතිවරයාට තියන අයිතියක්. ඒත් ජනාධිපතිවරයාට කරන්න බැරි තත්ත්වයක් උදාවෙලා තියෙනවා. මොකද අගමැතිවරයා විරුද්ධවීම නිසා. විධායක බලය පාවිච්චි කරන අගමැතිවරයෙක් සහ විධායක බලය පාවිච්චි කරන ජනාධිපතිවරයකු සිටිනවිට කිසිම දෙයක් කරන්න බැහැ. මෙහෙම ගියොත් රට විනාශවෙලා යනවා. අපිට දුක ඒකයි.
පුත්තලම දිස්ත‍්‍රික් පාර්ලිමේන්තු මන්ත‍්‍රී සනත් නිශාන්ත පෙරේරා, වයඹ පළාත් සභා මන්ත‍්‍රී පාලිත රෝහණ යන මහත්වරුද මෙම අවස්ථාවට එක්ව සිටියහ.
