(විනීතා එම් ගමගේ)
රවී කරුණානායක මහතාට එරෙහිව ඒකාබද්ධ විපක්ෂය ගෙන ආ විශ්වාස භංගයේ දී ඡන්දය නොදී මහින්ද රාජපක්ෂ මහතා ඔහුට දුරකථන ඇමතුමක් දුන් බවට ජනාධිපතිවරයා වේදිකාවේ කියාගෙන යන කතාව බොරුවක් බවත් එම විශ්වාසභංගය විවාදයට නොගත් බවත් පාර්ලිමේන්තු මන්ත‍්‍රී කෙහෙලිය රඹුක්වැල්ල මහතා ප‍්‍රකාශ කළේය.
මහින්ද රාජපක්ෂ මහතාට මඩ ගැසීමට නොයෙක් කථා දැන් දැන් කියන බවත් මෙයත් වැරදී කියු එවැනි කථාවක් බවත් හෙතෙම සඳහන් කළේය.
මේ කියන විශ්වාසභංගය අස්සන් කළේ මගේ පුතාගෙ මඟුල් ගෙදරදි. අපේ බොහෝ දෙනෙක් අස්සන් කළේ එතනදි. ස්ටේජ් එකට නැග්ගම කවුරු හරි යවන චිට්වල තියෙන ඒවා කියනවා. මේකත් ඒ වගේ එකක්.
මම මේක ඇහුණම පාර්ලිමේන්තු මහ ලේකම්ට කෝල් කරල ඇහුවා. එතුමා කිව්වෙත් මේ විශ්වාසභංගය විවාදයට ගත්තෙ නැහැ කියලායි යැයි ද රඹුක්වැල්ල මහතා කීය.
මන්ත‍්‍රීවරයා මේ අදහස් පළ කළේ ශ්‍රී ලංකා පොදුජන පෙරමුණේ ප‍්‍රධාන කාර්යාලයේ අද (23) පැවැති මාධ්‍ය හමුවක දීය.
