(නාලක සංජීව දහනායක)
ප්‍රජාතන්ත්‍රවාදයට හා ප්‍රචණ්ඩවාදයට කිසිදා එකට පැවැතිය නොහැකි බව ප්‍රජාතන්ත්‍රවාදී වාමාංශික පෙරමුණේ ප්‍රධාන ලේකම් පාර්ලිමේන්තු මන්ත්‍රී වාසුදේව නානායක්කාර මහතා ඊයේ (28) පැවැසීය.
මැරෙන්න බලාගෙන ආණ්ඩුවට එරෙහිව කට ඇරීමට සිදුව තිබෙන බවත් ඒ බව දැන දැනම තමන් ආණ්ඩුවට එරෙහිව කතා කරන බවත් මන්ත්‍රීවරයා කීය.
සමාජවාදී ජනතා පෙරමුණ බොරැල්ල, ආචාර්ය එන්.එම් පෙරේරා කේන්ද්‍රයේ ඊයේ (28) පැවැත්වූ මාධ්‍ය හමුවකට එක්වෙමින් ඔහු මේ බව සඳහන් කළේය.
මන්ත්‍රීවරයා මෙසේද පැවැසීය.
අපේ රටේ සෞඛ්‍ය වර්ධනය පිළිබඳව අමාත්‍යවරයා ලෝකයට අඬබෙර ගහනවා. සෞඛ්‍ය අමාත්‍යවරයාගේ සේවය අගයන්න මේ දවස්වල ලෝක සෞඛ්‍ය සංවිධානයේ නියෝජිතයන් පිරිසක් අපේ රටට පැමිණ සිටිනවා. ඇමැතිවරයා ඇගයුම් ලබන අතරදී රටේ මන්දපෝෂණය ශීඝ්‍රයෙන් වැඩිවෙලා. මන්දපෝෂණය වැඩිවීම අතින් ආසියානු කලාපයෙන්ම අපේ රට දෙවැනි වන්නේ ඇෆ්ගනිස්ථානයට පමණයි.
ප්‍රතිශතයක් ලෙස ගත්විට සාමාන්‍යයෙන් අපේ රටේ මන්දපෝෂණයෙන් පෙළෙන ප්‍රමාණය සමස්ත ජනගහනයෙන් සියයට 22ක් පමණ වෙනවා. රටේ ඉහළ ආදායම් ලබන ජනතාවත් ඒ ඉලක්කමට අයිති වෙනවා. නමුත් ඉතාම දුෂ්කර ප්‍රදේශවල හා වතුකරයේදී මෙම තත්ත්වය ඉතාම බරපතළ තත්ත්වයක් පෙන්නුම් කරනවා. ඒ නිසා ලෝක සෞඛ්‍ය සංවිධානය, එක්සත් ජාතීන්ගේ සංවිධානය වැනි ආයතන සෞඛ්‍ය අමාත්‍යවරයාට එරෙහිව හඬක් නඟාවි යැයි මම බලාපොරොත්තු වුණා. නමුත් එහෙම වුණේ නැහැ.
එමෙන්ම මේ වනවිට දකුණු පළාත පුරාම ඉන්ෆ්ලුවෙන්සා නමැති උණ රෝගය පැතිරී යනවා. එම උණට ගොදුරුවූ දරුවන්ගෙන් කරාපිටිය රෝහලේ ළමා දැඩිසත්කාර ඒකකය පිරිලා. එම නිසා වැඩිහිටියන් සඳහා වෙන්වූ දැඩි සත්කාර ඒකකයේ උණ රෝගය වැලඳුණු ළමයින්ට ප්‍රතිකාර කරනවා. මෙම උණ රෝගී තත්ත්වය දැන්ම මර්දනය නොකළහොත් එය වසංගත තත්ත්වයක් දක්වා වර්ධනය විය හැකියි. ඒ නිසා ශල්‍යාගාර පහසුකම් සහ අවශ්‍ය අනෙකුත් පහසුකම් ආදිය සලසමින් රෝගය පාලනය කිරීමට රජය කටයුතු කළ යුතුයි.
විධායක ජනාධිපති ක්‍රමයට එරෙහිව ජනතා විමුක්ති පෙරමුණ මුල සිටම පෙනී සිටියා. නමුත් ඔවුන් මේ මොහොතේදීම 20 වැනි ආණ්ඩුක්‍රම ව්‍යවස්ථා සංශෝධනය ගේන්නේ ඇයි?. මේ වනවිට ආණ්ඩුව අර්බුද ගණනාවකට මුහුණ දී තිබෙනවා. මෙම සංශෝධනය ඉදිරිපත් කිරීමත් සමඟම මුලු රටම ඒ ගැන කතාකරන්න පටන් ගන්නවා. එවිට ආණ්ඩුව ඇතුළත තිබෙන අර්බුද ඉබේම යට යනවා.
එමෙන්ම දැනට පනවා තිබෙන වැට් බද්ද 2020 වසරේදී සියයට දෙකයි දශම පහකින් අඩුකරන බව මුදල් අමාත්‍ය මංගල සමරවීර මහතා පවසා තිබුණා. 2020 වසර වනවිට මීටත් වඩා ජීවන වියදම ඉහළ ගොස්, රුපියල තවදුරටත් අවප්‍රමාණය වේවි. ඒ නිසා එම කාලයේදී සියයට 2.5 වැට් බද්ද අඩුකිරීමේ ප්‍රතිඵලය කුමක් වේදැයි දන්නේ නැහැ.
ලබන වසර වනවිට රටේ ජාතික ණය ඇමරිකානු ඩොලර් බිලියන 4.3 ක් අවශ්‍ය බව මුදල් අමාත්‍යවරයා පවසා තිබුණා. එහෙත් සමස්ත ණය ඇමරිකානු ඩොලර් බිලියන 3.5 වන බව මහබැංකු අධිපතිවරයා පවසනවා. ඇමරිකානු ඩොලර් බිලියන 9.4 සංචිතයක් තිබෙන බැවින් ඒ ණය මුදල ගෙවීම අමාරු නොවන බවත් මහ බැංකු අධිපතිවරයා පවසනවා. දැන් අපි පිළිගන්න ඕන ඇමැතිවරයා කියන දෙයද, එහෙමත් නැත්නම් මහ බැංකු අධිපතිවරයා කියන දෙයද?.
බැඳුම්කර වංචාවේ ප්‍රධාන අපරාධකරු වන අර්ජුන් මහේන්ද්‍රන් මේ වනවිට සිංගප්පූරුවේ සිටින බව ජාත්‍යන්තර පොලිසිය සඳහන් කරනවා. ඔහු මෙරටට ගෙන්වා ගැනීමට නම් උදර්පන නීතිය අනුව කටයුතු කළ යුතුයි. එසේ නොමැතිනම් රාජ්‍යතාන්ත්‍රික මට්ටමින් ඒ සඳහා මැදිහත් විය යුතුයි. එහිදී අර්ජුන් මහේන්ද්‍රන් මෙරටට එවන ලෙස රජය සිංගප්පූරුවෙන් ඉල්ලීම් කරන්න ඕනෑ. නමුත් මේ රජයෙන් එවැන්නක් බලාපොරොත්තු වෙන්න බැහැ.
අගමැතිවරයාට හැමදාමත් තනතුරේ ඉන්න බැහැ. අගමැතිවරයාගේ හිතවතුන් නොවන පිරිසක් අතට බලය මාරුවීමෙන් අනාගතයේ දවසක ඔහුට මේ සම්බන්ධ පරීක්‍ෂණ කොමිසමක් ඉදිරියේ පෙනී සිටීමට සිදුවේවි. පර්පචුවල් ටේ‍රෂරීස් සමාගමේ හිමිකරුගෙන් මුදල් ගත් දේශපාලනඥයන් ගැන මේ දවස්වල කියවෙනවා. මම නම් කාගෙන්වත් සල්ලි අරගෙන නැහැ.
ගංවතුර ආපදා ගැන පසුගිය අවුරුදු තුනේදීම අපි පාර්ලිමේන්තුවේ කතා කළා. ආපදාවට ලක්වූවන්ට ඕනෑතරම් සල්ලි දෙන බව ආණ්ඩුව ඒ හැම වෙලාවෙම කිව්වා. නමුත් දෙන්නේ රුපියල් 10,000ක් පමණයි. ඒ මුදලත් නොලැබුණු පවුල් සිටිනවා. ඒ පිළිබඳව පාර්ලිමේන්තුවේදී ප්‍රශ්න කරන බවද මන්ත්‍රීවරයා කීය.
පාර්ලිමේන්තු මන්ත්‍රී චන්ද්‍රසිරි ගජධීර මහතා මෙසේ පැවැසීය.
මේ වනවිට දකුණු පළාත පුරාම ව්‍යාප්ත වන ඉන්ෆ්ලුවෙන්සා වසංගතය පසුගිය වසරේදී ඕස්ටේ්‍රලියාව, එංගලන්තය ආදී රටවල පැතිරුණා. ඒ නිසා අපේ රටේ මෙම රෝගය සංචාරක කලාප ආශ්‍රයෙන් පැතිරෙන්නට ඇතැයි වසංගත රෝග විශේෂඥයන් කල්පනා කරනවා. මෙවැනි වසංගත රෝග පාලනය කිරීම සඳහා වෙනත් රටවල් පූර්ව සූදානමක් ඇතිකර ගන්නවා. වෙනත් රටවල් මෙවැනි රෝග පාලනය කිරීම සඳහා විශේෂඥයන්ගේ සහාය ලබා ගන්නවා. නමුත් අපේ රටේ එවැන්නක් නැහැ. දැනට දකුණු පළාතේ පැතිරී යන මෙම රෝගය දැන්ම පාලනය නොකළහොත් මෙය මුළු රටටම දරුණු වසංගතයක් වේවි.
ගොඩනැගිලි ඉදිකිරීමෙන් රටක සංවර්ධන මනින්න බැහැ. සංවර්ධනය තිබිය යුත්තේ මිනිසුන් වෙනුවෙනුයි. අපේ රටේ ළමුන් සඳහා දැඩි සත්කාර ඒකක තිබෙන්නේ 4යි. වසංගත රෝග විශේෂඥයන් ඉන්නේ 10 දෙනයි. මෙවැනි තත්ත්වයක් හමුවේ වසංගත තත්ත්වයකට මුහුණ දෙන්නේ කොහොමද?.
අද පාතාලය මෙහෙයවන්නේ පිටරට ඉඳගෙනයි. රටේ ආර්ථිකය මෙහෙයවන්නේත් පිටරට ඉන්න අයයි. ඒ නිසා මනුෂ්‍ය ඝාතකයන් මෙන්ම ආර්ථික ඝාතකයනුත් රටට හෙළිකළ යුතුයි. දිනපතාම වගේ වැඩ වර්ජන, උද්ඝෝෂණ ආදිය පැවැත්වීමෙන් රටේ සංවර්ධනය ආපස්සට යනවා. පසුගිය වසරේදී වර්ජන 32ක් පැවැතීම නිසා රටට නිෂ්පාදන පැය 58279 ක් අහිමි වෙලා තිබෙන බව මහ බැංකු වාර්තාවේ සඳහන් වෙනවා. මේ නිසා රට බරපතළ ආර්ථික අර්බුදයකට මුහුණ දෙන බවද මන්ත්‍රීවරයා පැවැසීය.
ශ්‍රී ලංකාවේ කොමියුනිස්ට් පක්‍ෂයේ සභාපති රාජා කොල්ලුරේ, ලංකා සමසමාජ පක්‍ෂයේ ප්‍රධාන ලේකම් මහාචාර්ය තිස්ස විතාරණ, ශ්‍රී ලංකා මහජන පක්‍ෂයේ නායක පළාත් සභා මන්ත්‍රී අසංක නවරත්න යන මහත්වරුද දේශවිමුක්ති ජනතා පෙරමුණේ උපසභාපති ගලගම ධම්මරංසි හිමියෝද මෙහිදී අදහස් දැක්වූහ.
