(මුලටියන - එස්. බාලසූරිය)
අපේ රටේ දැවැන්ත මූල්‍ය අර්බුදයක් ඇති වී තිබෙන්නේ මහ බැංකුව හොරු කැඩුව නිසයි. ඒ නිසා සාමසර කන්ද නාය ගියා වාගේ රටේ සල්ලි නාය ගියා. ඉදිරියේදී විදුලි බිල, ජල ගාස්තු, කිරි පිටි මිල, ඉන්ධන මිල ඉහළ දමනවා. බඩු මිල අහස උසට නගිනවා. මෙහෙම කරන්නේ රටේ සල්ලි නැති නිසයි යැයි හිටපු අමාත්‍ය මාතර දිස්ත්‍රික් පාර්ලිමේන්තු මන්ත්‍රී මහින්ද යාපා අබේවර්ධන මහතා මුලටියනදී ඉකුත් දා (26) පැවසීය.
2018 පළාත් පාලන ඡන්දයෙන් මුලටියන සභාවට තේරී පත් වූ මහජන නියෝජිතයන් පිළිගැනීමේ උත්සවයේදී ඔහු මේ බව සඳහන් කළේය. මුලටියන ප්‍රාදේශීය සභාවේ ලේකම් එච්.එම්. සිරියලතා මහත්මිය ප්‍රමුඛ කාර්ය මණ්ඩලය එම උත්සවය සංවිධානය කර තිබුණි. මහින්ද යාපා අබේවර්ධන මහතා එහිදී මෙසේද කීය.
“පළාත් පාලන මැතිවරණය මාස 40 ක් කල් දමා තිබුණා. මේ ආණ්ඩුව ජනතාවගේ ඡන්ද අයිතිය උදුරා ගත්තා. දැඩි අරගලයකින් පසුව ජනතාවගේ එම අයිතිය යළි ලබා ගත්තා. දැන් අලුත් කාලයක් ආරම්භ වී තිබෙනවා. මේ අපගේ රටයි. මේ රට හැර වෙනත් රටක් නැහැ. අපේ රට පිළිබඳව අපට හැඟීමක් කැක්කුමක් තිබෙනවා. මේ ආණ්ඩුවේ ගත
වූ වසර තුනක කාල සීමාවේදී රට යන දිශාව පිළිබඳව සතුටු වෙන්න පුළුවන්ද? එදා මුලටියන හන්දිය තිබුණේ කොහොමද? මහින්ද රාජපක්ෂ යුගයේදී තමයි මුලටියන සංවර්ධනය කළේ.
රටේ ශීඝ්‍ර දියුණුවක් ඇති වුණේ ඒ යුගයේදීය. මේ ප්‍රාදේශීය සභා ගොඩනැගිල්ල හැදුවේ ණයට සල්ලි අරගෙන නොවෙයි මේ රටේ මහජනතාවගේ මුදල්වලින්. මහින්ද මහත්තයා මේ රට විකුණුවේ නැහැ. පාවා දුන්නේ නැහැ.
පසුගියදා සම්මත කර ගත් පනත අනුව ඕනෑම රටකින් ඕනෑම පොලියකට ණය ලබා ගන්න පුළුවන්. මීට පස්සේ හොරකම් කළාට උසාවි යන්න වෙන්නේ නැහැ. විශ්වාස භංගයෙන් ආණ්ඩුව පැරදුණත් 19 වැනි සංශෝධනය අනුව මේ ආණ්ඩුව විසුරුවන්න බැහැ. මහින්ද රාජපක්ෂ හා සරත් විජේසේකර යන මහත්වරුන් හැර අපත් ඒකට සම්මාදන්
වුණා. තවත් මාස 16කින් මහ මැතිවරණය පැවැත්වෙනවා. එදා බොරු ප්‍රචාර නිසා හංසයාට කතිරය ගැහුවා. ඒ වැරැද්ද නිවැරදි කර ගන්න පසුගිය පළාත් පාලන ඡන්දයේදී ජනතාව පොහොට්ටුවට ඡන්දය දුන්නා. මේ
රටේ ජනතාවගේ කැක්කුම තමයි ඒ පිට වුණේ. එහෙම කළේ මේ රටේ වැඩ කරපු යුගය යළි ගේන්නයි. මුලටියන සභාවට තේරුණු මහජන නියෝජිතයන්ට පැවරෙන වගකීම විශාලයි. නමුත් එදා වගේ ආණ්ඩුවෙන් මුදල් ලැබෙන
එකක් නැහැ. ඒ නිසා ජනතාවගේ අවශ්‍යතාවන් වෙනුවෙන් අරපිරිමැස්මෙන් කටයුතු කරන්න. පොහොට්ටුවේ මන්ත්‍රීවරයකු හැම ගමකටම ඉන්න නිසා අපට දිගු ගමනක් යන්න පුළුවන්” යැයි ද ඔහු කීය.
මුලටියන ප්‍රාදේශීය සභාවේ සභාපති සුනිල් ඇල්ලදෙණිය මහතා. “මුලටියන ප්‍රාදේශීය සභාවේ කොට්ඨාස 13 ම අප ජයග්‍රහණය කළා. අප සියලුම දෙනා එකමුතුව කටයුතු කළා. ඒවාගේම ජාතික ලැයිස්තුවෙන් තේරී පත් වූ අනෙකුත්
පක්ෂවල මන්ත්‍රීවරුන් 11 දෙනා සමග එකතු වී මුලටියන ප්‍රාදේශීය සභාවේ උන්නතියට කටයුතු කිරීම අපගේ අරමුණයි. මුලටියන ප්‍රාදේශීය සභාව පිළිබඳව මුළු ලංකාව පුරාම දන්නවා. ඒ ප්‍රසිද්ධිය අපට ලබා දුන්නේ මාධ්‍යයයි. අඩුපාඩු වාගේම අප කරන සංවර්ධන කටයුතු පිළිබඳව ජනතාවට පෙන්වා දුන්නා. ඒ පිළිබඳවත් මාගේ ස්තුතිය
පිරිනමනවා.
කඹුරුපිටිය ප්‍රාදේශීය සභාවේ සභාපති සංජීව ප්‍රියනාත් මහතා ඇතුළු විශාල පිරිසක් එම අවස්ථාවට සහභාගි වී සිටියහ.
