(නිමල කොඩිතුවක්කු)
රට තුළ පවතින අර්බුධ හමුවේ වත්මන් රජය ජාත්‍යන්තරය හා එක්ව රණවිරු දඩයම වෙනත් මුහුණුවරකින් ආරම්භ කර ඇතැයි ජාතික නිදහස් පෙරමුණේ ජාතික සංවිධායක පාර්ලිමේන්තු මන්ත‍්‍රි ජයන්ත සමරවිර මහතා පැවසීය.
රජයේ මෙම කූට උපක‍්‍රම පැරදවිමට ජනතාව බුද්ධිමත්ව කටයුතු කළ යුතුව ඇතැයිද ඔහු කියා සිටියේය.
පිටකෝට්ටේ පිහිටි ජාතික නිදහස් පෙරමුණු මූලස්ථානයේ අද(15) පැවති මාධ්‍ය හමුවකට එක්වෙමින් ඒ මහතා මේ බව පැවසීය.
එහිදී වැඩිදුරටත් අදහස් දැක්වූ ජාතික නිදහස් පෙරමුණේ ජාතික සංවිධායක පාර්ලිමේන්තු මන්ත‍්‍රි ජයන්ත සමරවිර මහතා මෙසේද කීය.
‘‘මේ ආණ්ඩුව රණවිරුවන්ව දඩයම් කිරීම දැන් නව වටයකින් ආරම්භ කරලා තියෙනවා.තෙල්දෙනියේ ගින්න අසේසෙයි ෆේස් බුක් තහනම අසසේ තමයි මේ කටයුතු සිද්ධවෙන්නේ. බලහත්කාරයෙන් පුද්ගලයින් අතුරුදහන් කිරීම වැලැක්වීමේ ජාත්‍යන්තර සම්මුතිය පාර්ලිමේන්තුවට ගෙනල්ලා පාර්ලිමේන්තුවේ ස්ථාවර නියෝග නොතකා, මන්තී‍්‍රවරුන්ගේ විරෝධතාවය නොතකා මෙම සම්මුතිය ලංකාවේ නීතියට ඇතුළු කළා.
ලෝකයේ කිසිම රටක් එක තමන්ගේ රටේ නීතියට ඇතුළු කරගෙන නැහැ. ඒ වගේම නිමල්කා ප‍්‍රනාන්දුව දාලා අතුරුදහන් වූවන්ගේ කාර්යාලය පිහිටුවීම සිදු කළා.
දැන් බුද්ධි අංශ දඩයම් කිරීම ආරම්භ කරලා තියෙනවා. සිංහල මුස්ලිම් ලේ ගලාගෙන යන්න ආණ්ඩුව සලස්සලා තියෙනවා. බුද්ධි අංශ මේවා අනාවරණය කර ගැනීමට අසමත්වෙලා තියෙනවා කියලත් කියනවා.
ඒ විදිහට බුද්ධි අංශ වලට චෝදනා කරන ගමන් කොටි ත‍්‍රස්තවාදීන් පරාජය කරන්න දිවි නොතකා කටයුතු කළ රණවිරුවන්, බුද්ධි අංශ දඩයම් කිරීමත් ආරම්භ කරලා තියෙනවා.
මංගල සමරවීර , සෙයිද් අල් හුසේන්ගේ වාර්තාව පිළි ගෙන එහි කොන්දේසි එකින් එක කි‍්‍රයාත්මක කරනවා. ඇමරිකාව ප‍්‍රමුඛ බටහිර රටවල් මේ යපාලන ආණ්ඩුව පවත්වාගෙන යන්නේ ඒවා ක‍්‍රියාත්මක කර ගැනීමටයි.
ඇමරිකානු තානාපති කාර්යාලයත්, ඉන්දියානු මහකොමසාරිස් කාර්යාලය පෙබරවාරි 10 වැනිදා නොනිදා කටයුතු කළේ ඔවුන්ගේ ඕනෑ එපාකම් ඉටුකර ගැනීමටයි. මේ හංසපූට්ටුව තවදුරටත් යන්න ඕනේ කියලා ඔවුන් බලකරලා තියෙනවා. ඔවුන්ගේ උවමනාවන් මත අතුරුදහන් වූවන්ගේ කාර්යාලය පිහිටුවීම දැන් එක පැත්තකින් සිදු කළා.
