(අංජුල මහික වීරරත්න සහ චාමින්ද දිසානායක)
රාජපක්ෂ යුගයෙන් රටට උරුම වූ ඩොලර් කෝටි 3600ක ණය කන්දක් ගෙවා දමා සංවර්ධනයක් ඇති කිරීමේ පදනම යහපාලන රජය විසින් දමා අවසන් බව අග‍්‍රාමාත්‍ය රනිල් වික‍්‍රමසිංහ මහතා ගොඩකවෙලදී ඊයේ (30) පැවැසීය.
රටක් ලෙස අප ණයට යට වුවහොත් ලෝකය ඉදිරියේ වහලූන් බවට පත්වන බව කී අග‍්‍රාමාත්‍යවරයා ශ්‍රී ලාංකිකයන් එම තත්ත්වයට ඇද දැමීමට යහපාලන රජය සූදානම් නැතැයිද කීය.
අග‍්‍රාමාත්‍යවරයා මෙසේ පැවැසුවේ ගොඩකවෙල කුලරත්න ළමා නිවාසයේ 25 වැනි සංවත්සරයේ ප‍්‍රධාන ආරාධිතයා ලෙස සහභාගි වෙමිනි.
එහිදී වැඩිදුරටත් අදහස් දැක්වූ අග‍්‍රාමාත්‍යවරයා මෙසේද කීය.
”අද රටේ ආර්ථිකය පරණ ණය වලට යටවෙලා තිබෙනවා. මේ ණය කන්දරාව දුටුවිට සාමාන්‍ය පුද්ගලයකු නම් දිවි නසා ගන්නවා. නමුත් රටකට එහෙම කරන්න හැකියාවක් නෑ. ඒ නිසා කෙසේ හෝ මේ ආර්ථිකය ගොඩ ගැනීමට අප කල්පනා කරනවා. මේ ණය ගෙවා දැමීමට නම් ශක්තිමත් ආර්ථිකයක් ඇති කළ යුතුයි. මෙලෙස ණය ගැනීමෙන් රටවල් ඉදිරියට යන්නේ නෑ. ඒ නිසා ණය ගෙවා දැමීමට හැකි අයුරින් ආර්ථිකය හැසිරවීමට අපට හැකිවී තිබෙනවා. මුදල් විශාල ප‍්‍රමාණයක් ඊට වැය වෙනවා. සංවර්ධන කරන්නේ ඉතිරි මුදල්වලිනුයි. අයවැයෙන් මුදල් සොයාගෙන සංවර්ධනයත් ඉදිරියට ගෙනයෑමට අපට හැකි වී තිබෙනවා.
ලෝකය වටේ ගොස් ශ්‍රී ලංකාවේ හොඳ නම ආරක්ෂා කරගෙන විදේශ ආයෝජකයන් එන පසුබිම හදන්නට ජනාධිපතිතුමාටත් මටත් සිදුවී තිබෙනවා” යැයි අග‍්‍රාමාත්‍ය රනිල් වික‍්‍රමසිංහ මහතා වැඩිදුරටත් සඳහන් කළේය.
