(මුදිතා දයානන්ද)
විධායක ජනාධිපති ධූරය අහෝසි කිරිමේ ව්‍යවස්ථා සංශෝධනයක් පෞද්ගලික මන්ත‍්‍රී යෝජනාවක් ලෙස තම පක්ෂය විසින් ඉදිරියේදි පාර්ලිමේන්තුවට ගෙන එන බව ජනතා විමුක්ති පෙරමුණේ නායක පාර්ලිමේන්තු මන්ත‍්‍රී අනුර කුමාර දිසානායක මහතා අද (19) පැවසීය.
දිසානායක මහතා මෙසේ පැවසූයේ පැලවත්තේ පිහිටි ජනතා විමුක්ති පෙරමුණු ප‍්‍රධාන කාර්යාලයේදී පැවති මාධ්‍ය සාකච්ඡාවකදී අදහස් දක්වමින් වන අතර තවදුරටත් අදහස් දැක්වු ඒ මහතා මෙසේද පැවසීය.
දැන් රටේ යම් ව්‍යාකූල තත්වයක් අස්ථාවර බවක් නිර්මාණය වී තිබෙනවා. ඉතිහාසයේ මතුවු මෙවැනි අවස්ථාවල ඒ තත්ත්වය ප‍්‍රයෝජනයට ගනිමින් රටට ජනතාවට ජයග‍්‍රහණ ලබාදෙන්න අපිට හැකිවී තිබෙනවා. ඒ නිසා අපි බලාපොරොත්තු වෙනවා මේ වෙලාවේ පක්ෂ විපක්ෂ භේදයකින් තොරව හැම පක්ෂයක්ම අතීතයේදි අහෝසි කළ යුතුයි කියලා පොරොන්දුවි තිබෙන විධායක ජනාධිපති ක්රමය අහෝසි කිරිම සඳහා ව්‍යවස්ථා සංශෝධනයක් අපේ මන්ත‍්‍රීවරයෙක්ගේ පෞද්ගලික යෝජනාවක් ලෙස ගෙන එන්න.
විධායක ජනාධිපති ධූරය අහෝසි කළ පසු පළාත් සභාවල බලය පවත්වාගෙන යාමට ජනාධිපතිගේ බලතලක අනුව පිහිටුවා තිබෙන ආණ්ඩුකාරවරයා සම්බන්ධයෙන් ගැටළුවක් ඇති විය හැකියි. එය බෙදුම්වාදින්ට වාසි සහගත ලෙස යොදාගන්නට හැකියාව ලැබෙන්න පුළුවන්.
ඒ වගේම පවතින මැතිවරණ ක්රමය තුළ යම් අස්ථාවර ආණ්ඩුවක් යටතේ පාලනය පවත්වාගෙන යන අවස්ථාවක එය ශක්තිමත් කරන්නේ විධායක ජනාධිපතිවරයාගේ බලතල වලින් නිසා මැතිවරණ ක්රමය මෙලෙසම පවත්වාගෙන යමින් විධායක බලතල විතරක් අහෝසි කිරිම සුදුසු නොවන බවට මතයක්ද පවතිනවා. ඒ නිසා මේ දෙකම සැළකිල්ලට ගනිමින් මේ කෙටුම්පත සකස් කිරිමට අප අදහස් කරන අතර අනෙක් පක්ෂවලට ඊට යෝජනා ඉදිරිපත් කිරිමටද හැකියාව තිබෙනවා.
