(නිමල කොඩිතුවක්කු)
වත්මන් යහපාලන ජාතික ආණ්ඩුව මේ වසර දෙකක කාලයේ ඇහැට පේන සංවර්ධනයට වඩා ඇඟට දැනෙන සංවර්ධනයක් සිදු කළ බව එක්සත් ජාතික පක්ෂයේ මහලේකම් රාජ්‍ය ව්‍යවසාය සංවර්ධන අමාත්‍ය කබීර් හෂීම් මහතා අද(8) පැවසීය.
අවුරුදු 20ක දිගු නින්දකින් පසු අවදිවී සිටින ඒකාබද්ධ විපක්ෂය අද හිම වලහගේ ප‍්‍රතිපත්තිය අනුගමනය කරමින් සිටින බවත් මහලේකම්වරයා සදහන් කළේය.
පිටකෝට්ටේ පිහිටි සිරිකොත එක්සත් ජාතික පක්ෂ මූලස්ථානයේ පැවති මාධ්‍ය හුමුවකට එක්වෙමින් ඒ මහතා මේ බව පැවසීය.
‘‘පහුගිය දිනවල ඒකාබද්ධ විපක්ෂයෙන් එක්සත් ජාතික පක්ෂයට විවේචන අවලාද නගලා තිබුණා. එක්සත් ජාතික පක්ෂය ධනවාදී පක්ෂයක් බවත්, එක්සත් ජාතික පක්ෂය ජනතා ප‍්‍රසාදය සදහා වැඩ කරන්නේ නැති බවත් ඒ වගේම අපේ පක්ෂය පෞද්ගලීකරණය සදහා දැඩි පියවර ගනිමින් සිටින බවටත් විවිධ අවලාද චෝදනා අපිට නගලා තිබුණා. අපි ඒ අයට කියනවා වීදුරු ගෙවල් වල ඉදන් ගල් ගහන එක භයානක දෙයක් කියලා‘‘ යැයි ද ඔහු කීය.
