(නිමල කොඩිතුවක්කු)
යහපාලනය පෙන්වමින් රට වීදි ගණිකාවක් බවට පත්කරන වත්මන් රජයේ ක‍්‍රියා කළාපය බුදු සරණයි බෝඩ් ලෑල්ල දමාගෙන හොර හරක් පටවන ලොරි රථ මෙන් බව ජනතා විමුක්ති පෙරමුණේ දේශපාලන මණ්ඩල සභික පාර්ලිමේන්තු මන්ත‍්‍රි බිමල් රත්නායක මහතා අද (14) පැවසීය.
බහුජාතක සමාගම් වලට ඕනෑ විදියට රටේ වැදගත් අණපනත් පවා වෙනස් කරමින් වත්මන් රජය රට ආගධය කරා මෙහෙයවමින් පවතින බවද මන්ත‍්‍රිවරයා සදහන් කළේය.
බත්තරමුල්ල පැලවත්ත ප‍්‍රදේශයේ පිහිට ජනතා විමුක්ති පෙරමුණු ප‍්‍රධාන කාර්යාලයේ පැවති මාධ්‍ය හමුවකට එක්වෙමින් මෙසේ පැවසීය.
යල් පැන ගිය බව පවසමින් රේගු ආඥා පනත, අධ්‍යාපන ආඥා පනත, සාප්පු සහ කාර්යාලීය සේවකයන් පිළිබඳ ආඥා පනත, රජයේ ඉඩම් ආඥා පනත, කුඹුරු ආඥා පනත ආදී රටට වැදගත් ආඥා පනත් 10ක් අහෝසි කිරීමේ උත්සාහයක රජය නිරත වී සිටින බවද හෙතෙම කීය.
ජනතාව තුළ යම්කිසි අයිතිවාසිකම් ප‍්‍රමාණයක් හෝ ඉතිරි වී තිබුණේ නම් එයට ප‍්‍රහාර එල්ල කිරීම මෙහි අරමුණ වී ඇති බවද මන්ත‍්‍රිවරයා සඳහන් කළේය.
