(ඩයනා උදයංගනී)
බැසිල් රාජපක්‍ෂ මහතා කී ආකාරයට හිටපු ජනාධිපති මහින්ද රාජපක්‍ෂ මහතා ආණ්ඩු කළා නම් තවමත් ඒ ආණ්ඩුව තිබෙන බවත් බැසිල් රාජපක්‍ෂ මහතාට ලෝක දේශපාලනය ගැන මනා දැනුමක් තිබෙන බවත් සම කැබිනට් ප‍්‍රකාශක, සෞඛ්‍ය පෝෂණ හා දේශීය වෛද්‍ය අමාත්‍ය රාජිත සේනාරත්න මහතා අද(4) පැවසීය.
නමුත් මහින්ද රාජපක්‍ෂ මහතා කටයුතු කළේ ගෝඨාභය රාජපක්‍ෂ මහතා කී විදියට බව කී අමාත්‍යවරයා උතුරු පළාතේ හමුදාව යටතේ ඇති ඉඩම් ජනතාවට ලබාදීමේදී විශාලම බාධාවක් වී තිබුණේ ඒකාබද්ධ විපක්‍ෂයේ පිරිස වුවත්, එම ඉඩම් කඩිනමින් නිදහස් කළ යුතු බව බැසිල් රාජපක්‍ෂ මහතා ප‍්‍රකාශ කිර තිබීමෙන් එම බාධාව ඉවත් වූ බව ද කීවේය.
හමුදාව අපරාධ කළ බව ද බැසිල් රාජපක්‍ෂ මහතා කියා ඇති බව අමාත්‍යවරයා ප‍්‍රකාශ කළේය.
අමාත්‍ය රාජිත සේනාරත්න මහතා මේ බව පැවසුවේ රජයේ ප‍්‍රවෘත්ති දෙපාර්තමේන්තුවේදී අද (4) පැවති කැබිනට් තීරණ දැනුම්දීමේ මාධ්‍ය හමුවේදී මාධ්‍යවේදීන් නැගූ ප‍්‍රශ්නවලට පිළිතුරු දෙමිනි.
