ගාල්ල සිරංගිකා ලොකුකරවිට
උතුරු නැගෙනහිර ජනතාවට ඇති ගැටළුව දේශපාලකයන් ලෙස අපි සියලු දෙනාත් රජයේ නිලධාරීන් සියලු දෙනාත් හොඳින් තේරුම්ගෙන කටයතු කිරීම අත්‍යාවශ්‍ය බව ස්වදේශ කටයුතු අමාත්‍ය වජිර අබේවර්ධන මහතා පවසයි. ඒ මහතා මේ බව කියා සිටියේ ‘‘නිල මෙහෙවර ජනපති ජනතා සේවය“ වැඩසටහන පිළිබඳ රාජ්‍ය නිලධාරීන් දැනුම්වත් කිරීමේ රැස්වීමක දී ය.
අමාත්‍යවරයා වැඩිදුරටත් මෙසේ ද කීවේය.
‘‘ උතුරේ වවුනියාව, මන්නාරම, මුලතිව් හා කිලිනොච්චි කියන දිස්ත්‍රික්කවල අපි දැන් ප්‍රාදේශීය නිල මෙහෙවර වැඩසටහන පවත්වනවා. මේ දිස්ත්‍රික්කවල තිබෙන්නේ ප්‍රාදේශීය ලේකම් කාර්යාල සුළු සංඛ්‍යාවක්. ඒ වුණත් භූමි ප්‍රමාණය විශාලයි. ජනගහනය අඩුයි. පවුල් සංඛ්‍යාව අඩුයි. ඇතැම් මාර්ග තිබෙනවා ට්‍රැක්ටරයක හැර වෙනත් වාහනයක යාමට හැකියාවක් නැහැ. ඇතැම් ගම්මාන තිබෙනවා පසුගිය අවුරුදු 40ට ම යුද නිලධාරීන් හැර වෙනත් කිසිම රජයේ නිලධාරියෙක් ඇවිල්ලා නැහැ. මේ ජනතාවගේ ප්‍රශ්නය අපේ බහුතරයක් හිතාගෙන ඉන්නවාට වඩා වෙනස්. එක් ප්‍රාදේශීය නිල මෙහෙවරක උත්සව සභාවේ දී මා එතැන සිටි ජනතාවගෙන් ඇහුවා යුද්ධයෙන් එක් අයකු හෝ මිය නොගිය පවුලක කවුරුන් හරි ඉන්නවානම් අත ඔසවන්න කියා. සභාව නිහඬ වුණා. නමුත් කිසිම කෙනෙක් අත ඉස්සුවේ නැහැ. ඒ කියන්නේ මේ සෑම පවුලක ම එක්කෙනෙක් හෝ යුද්ධයෙන් මිය ගිහින් තිබෙනවා. ඊට පස්සේ මා හිනා වෙලා ඇහුවා හැමෝටම තුවක්කුවෙන් වෙඩි තියන්න පුළුවන් නේද කියලා. කවුරුවත් බෑ කිව්වේ නෑ. හැමෝම ඒ කතාව සනාථ කළා. එයයි උතුරේ තත්ත්වය. අපිට තිබෙන ප්‍රශ්නයට වඩා ඔවුන්ට තිබෙන ප්‍රශ්නය වෙනස්. මෙය අපි හරිහැටි තේරුම්ගත යුතුයි. “
