(ගුණසිංහ හේරත්)  

ඉදිකිරීම් කර්මාන්තයේ ඍජු හා වක්‍ර රැකියාවල නියුතු ලක්ෂ 12 කට ඒ රැකියා අහිමිවීමේ අවදානමක් උද්ගතව තිබෙන බව ශ්‍රී ලංකා ජාතික ඉදිකිරීම් සංගමයේ උපසභාපති ඩැරින්ටන් පෝල් මහතා කියයි.

ඉදිකිරීම් කර්මාන්තයට අත්‍යවශ්‍ය භාණ්ඩ හිඟවීම හා ඒවායේ මිල ඉහළයාම නිසා මේ තත්ත්වය උද්ගතව තිබෙන බව පෙන්වා දෙන පෝල් මහතා වර්මානයේ රටේ පවතින මේ තත්ත්වය ගැන ඉදිකිරීම් කර්මාන්තයට සම්බන්ධ ඉහළ රාජ්‍ය නිලධාරීන් සංවේදී නොවීම ඛේදවාචකයක් ලෙස හඳුන්වයි. සිමෙන්ති කොට්ටයක රජයේ පාලන මිල රුපියල් 1375ක් වුවත් වෙළෙඳපොළේ රුපියල් 1,800 සිට 2,200 අතර මිලකට සිමෙන්ති විකිණෙද්දී පාරිභෝගික අධිකාරිය නිහඬව සිටින බවටද පෝල් මහතා චෝදනා කරයි.  

2020 පෙබරවාරි මාසයේ සිට මේ වන විට වානේ කම්බි මිල සියයට 80 කින්ද සින්ක් ඇලුමිනියම් ෂීට් මිල සියයට 130 කින්ද දේශීය ටයිල් මිල සියයට 35කින් ද ඇලුමිනියම් මිල සියයට 60 කින් ද ඉහළ ගොස් ඇතැයි පෝල් මහතා පෙන්වා දෙයි.  

වෙළෙඳපොළේ පවතින භාණ්ඩ හිඟය සහ අධික මිල හේතුවෙන් ඉදිකිරීම් කොන්ත්‍රාත්කරුවන් තමන් භාරගත් කොන්ත්‍රාත් නිසි කලට නිම කිරීමට නොහැකිව අසරණව සිටින බවද පෝල් මහතා කියයි. ඒ හේතු මත කොන්ත්‍රාත් කාලය දීර්ඝ කරගැනීමට යාමේදී රාජ්‍ය නිලධාරීන් රටේ පවතින යථාර්ථයට පිටුපසින් කටයුතු කිරීම නිසා සුළු හා මධ්‍ය පරිමාණ ඉදිකිරීම් කොන්ත්‍රාත්කරුවන් 7000 ක් පමණ බරපතළ පීඩාවකට පත්ව සිටින බවද පෝල් මහතා පෙන්වා දෙයි.