අංජුල මහික වීරරත්න
එක්සත් ජාතික පක්ෂයේ 76 වැනි සම්මේලනය ‘‘එක්වෙමු’’ යන
තේමාව යටතේ ලබන සැප්තැම්බර් 06 වැනිදා කොළඹ සුගතදාස ක්‍රීඩාංගණයේදී පැවැත්වීමට නියමිතය.
එක්සත් ජාතික පක්ෂ නායක, ජනාධිපති රනිල් වික්‍රමසිංහ මහතාගේ ප්‍රධානත්වයෙන් මෙම සංවත්සර සම්මේලනය පැවැත්වේ.
පක්ෂයේ ජනාධිපතිවරයෙකු යටතේ එක්සත් ජාතික පක්ෂය මෙවර සමුළුව පවත්වන්නේ වසර 28කට පසුවය. එක්සත් ජාතික පක්ෂ ජනාධිපතිවරයෙකු යටතේ ඔවුන් සංවත්සර සමුළුවක් පවත්වා ඇත්තේ 1993 දීය. ඉන්පසු පක්ෂ සමුළුවක් ජනාධිපතිවරයෙකු යටතේ පවත්වන්නේ ලබන සැප්තැම්බර් 6 වැනිදාය.
එක්සත් ජාතික පක්ෂ සංවත්සරය නියෝජ්‍ය නායක රුවන් විජයවර්ධන මහතාගේ නායකත්වයෙන් යුතු කමිටුවක් මගින් සංවිධානය කෙරෙන අතර සංවත්සරයට සමගාමීව සැප්තැම්බර් 04 දා දිවයින පුරා සෑම මැතිවරණ කොට්ඨාසයකම ආගමික වතාවත් පැවැත්වීමට ද නියමිතය.
