(සුජිත් හේවාජුලිගේ)  

කොවිඩ් ආසාදනය වීමෙන් මෙරට මියගිය අය සම්බන්ධයෙන් කරන ලද විමර්ශනයකට අදාළව සැකසුණු විශේෂ වාර්තාවක් සෞඛ්‍ය අමාත්‍යංශය විසින් රජයට පසුගිය සතියේ බාරදෙනු ලැබීය.  

එම වාර්තාවේ දැක්වෙන අන්දමට කොවිඩ් ආසාදනය වීමෙන් මියගිය මෙරට මුළු පුද්ගලයන් සංඛ්‍යාව වූ තුන් දහස් හය සිය හැත්තෑ හතරෙන් (පසුගිය ඔක්තෝබර් මස 27 වැනිදා වන විට) සියයට හැත්තෑ එකක් එනම් නව දහස් හය සිය හැත්තෑ හතරක්ම (9674) එකම කොවිඩ් එන්නත් මාත්‍රාවක් හෝ ලබා නොගත් අය වෙති.  
මියගිය මුළු පිරිසේ එන්නත ලබාගත් අය සිටියේ සියයට 29ක් එනම් තුන්දහස් නව සිය අනූ දෙකක් (3692) පමණක් බවද එම වාර්තාවේ සඳහන් වේ.  

මියගිය මුළු සංඛ්‍යාවෙන් එක එන්නත් මාත්‍රාවක් පමණක් ගත් අය සියයට විස්සක් එනම් දෙදහස් හයසිය අසූ දෙකක්ද (2682) එන්නත් මාත්‍රා දෙකම ගත් අය සියයට නවයක් එනම් එක් දහස් තුන් සිය දහයක් (1310) සිටි බව කොවිඩ් 19 සම්බන්ධීකාරක සහ සෞඛ්‍ය අමාත්‍යාංශයේ තාක්ෂණ සේවා අධ්‍යක්ෂ වෛද්‍ය අන්වර් හම්දානි මහතා ඉරිදා ලංකාදීපයට පැවැසීය.

  
කෙසේ වෙතත් කොවිඩ් එන්නත් මාත්‍රා දෙකම ලබාගෙන මියගිය අය අතර වැඩි දෙනකු වයෝවෘද සහ විවිධ නිදන්ගත රෝගවලින් පෙළුණු අය බව ද හෙතෙම සඳහන් කළේය.

  
කොවිඩ් ආසාදනය වී මියගිය දහතුන් දහස් හය සිය හැත්තෑ හතර දෙනාගෙන් එන්නත් එක මාත්‍රාවක් හෝ ලබා නොගෙන මියගිය පිරිසෙන් වැඩි දෙනෙක් පිරිමි වෙති. එලෙස මියගිය පිරිමි සංඛ්‍යාව පන්දහස් තුන්සිය පනස් දෙකකි.