අගරු චෙක්වල කෝටි 300 ක් හිරවෙලා
(සුජිත් හේවාජුලිගේ)
මේ රටේ කෝටිපති ව්‍යාපාරිකයන් ඇතුළු බදු ගෙවන්නන් රැසක් රුපියල් කෝටි තුන්සියකට වඩා වටිනා අගරු චෙක්පත් (මුදල් නොමැති) දේශීය ආදායම් දෙපාර්තමේන්තුවට ලබාදීම නිසා එම බදු මුදල් අය කර ගැනීම ගැටලුකාරි වී ඇතැයි ජාතික විගණන කාර්යාලයේ අලුත්ම වාර්තාවක සඳහන් වේ.
දේශීය ආදායම් දෙපාර්තමේන්තුවට මෙසේ ලබාදී ඇති අගරු චෙක්පත් සංඛ්‍යාව අට දහස් හැටකි.
අගරු චෙක්පත් වටිනාකම ඉහළ යෑමක් පෙනෙන්නට ඇති බවත් අගරු චෙක්පත්වලට අදාළ මුදල් කඩිනමින් අයකර ගැනීමට කටයුතු නොකිරීමෙන් බදු ගෙවන්නන්ට රාජ්‍ය ආදායම අවභාවිත කිරීමට අවකාශ සලසාදී ඇතැයි නිරීක්ෂණය වන බවත් ජාතික විගණන කාර්යාලය පවසයි.
රුපියල් ලක්ෂ දහයක් හෝ ඊට වැඩි මුදලක් සහිත අගරු චෙක්පත් එකකට වැඩි සංඛ්‍යාවක් ලබාදී ඇති බදු ගෙවන්නන් සංඛ්‍යාව 88කි. එලෙස ලබාදී ඇති අගරු චෙක්පත් සංඛ්‍යාව 322 ක් වන අතර ඒවායේ වටිනාකම කෝටි එකසිය දහයකි.
බදු ගෙවන්නන් සිය බදු වෙනුවෙන් චෙක්පත් ලබා දුන්නද නියමිත බැංකු පහසුකම් ලබා නොදීම නිසා මේ තත්ත්වය මතුව ඇතැයි පවසන විගණන අංශ එකතු කළ අගය මත බදු, ජාතිය ගොඩනැගීමේ බදු, ආදායම් බදු, ආර්ථික සේවා ගාස්තු, උපයන විට ගෙවීම් බදු හෝ වෙනත් බදු සඳහා මෙලෙස අගරු චෙක්පත් ඉදිරිපත් කර ඇතැයිද සඳහන් කරයි.
මේ සම්බන්ධයෙන් අප කළ විමසුමකදී දේශීය ආදායම් දෙපාර්තමේන්තුවේ නිලධාරියකු පැවසුවේ අගරු චෙක්පත් වටිනාකමින් සියයට 10 ක දඩ මුදලක් අයකර ගැනීමට කටයුතු කරන බවයි.
අගරු චෙක්පත්වල හිරවී ඇති හිඟ බදු මුදල් කඩිනමින් අය කරගැනීමට ක්‍රියාමාර්ග ගන්නා ලෙස ජාතික විගණන කාර්යාලය දේශීය ආදායම් දෙපාර්තමේන්තු ප්‍රධානීන්ට දැනුම් දී ඇත.
