(දයාසීලි ලියනගේ)
ටින් මාළු නිෂ්පාදනාගාරයක් ආරම්භ කිරීම සඳහා පසුගිය වසරේ ජූලි මාසයේදී රුපියල් කෝටි 50ක පමණ මුදලක් වැය කර ආනයනය කරන ලද යන්ත්‍රවල වගකීම් කාලය මේ වන විට ඉවත්ව ඇතත් මෙතෙක් එම කර්මාන්තශාලාව ආරම්භ කර නැති බව වාර්තා වේ.
මෙම කර්මාන්තශාලාව පිහිටුවීම සඳහා ගොඩනැගිලි ඉදි කිරීමටත් පෙර අදාළ යන්ත්‍ර ගෙන්වා ඇති බව බස්නාහිර පළාත් බල ප්‍රදේශයේ ජ්‍යෙෂ්ඨ නිලධාරියෙක් ප්‍රකාශ කළේය.
මෙම ගොඩනැගිල්ල ඉදි කිරීම මේ වන විට ආරම්භ කර ඇතත් එය ඉදිකර අවසන්වීමට තවත් මාස කීපයක් ගත වනු ඇතැයි අනාවරණය වී ඇත.
ටින් මාළු නිෂ්පාදනය සඳහා ගෙන්වන ලද යන්ත්‍රයේ වගකීම් කාලය ඉක්මවා ගොස් තිබෙන නිසා යම් ගැටලුකාරී තත්ත්වයක් ඇති වුවහොත් ඒ ගැන අදාළ නිෂ්පාදන ආයතනයෙන් විමසීමක් කළ නොහැකි තත්ත්වයක් තිබෙන බවද සඳහන් වේ.
