(තිළිණි ද සිල්වා සහ රංජන් කටුගම්පොළ)
සීමා නිර්ණය කමිටු වාර්තාව ඉදිරිපත් කර නොමැති අවස්ථාවක පළාත් සභා මැතිවරණය පැවැත්වීමට ඇති හැකියාව පිළිබඳ මතය විමසා ජනාධිපති මෛත්‍රීපාල සිරිසේන මහතා ඉදිරිපත් කර ඇති අයැදුම්පත පිළිබඳ විභාගය අවසන් කළ ශ්‍රේෂ්ඨාධිකරණය එහි තීන්දුව ඉදිරියේදී ජනාධිපති වෙත දන්වා යවන බව සිකුරාදා (23) නිවේදනය කළේය.
ජනාධිපතිවරයාගේ මෙම අයදුම්පත අගවිනිසුරු ජයන්ත ජයසූරිය මහතාගේ සභාපතිත්වයෙන්, බුවනෙක අළුවිහාරේ, සිසිර ද ආබෘ, ප්‍රසන්න ජයවර්ධන සහ විජිත් මළල්ගොඩ යන මහත්වරුන්ගෙන් සමන්විත විනිසුරු මඩුල්ල හමුවේ ඊයේ අධිකරණය හමුවේ විභාගයට ගැණුනි. ජනාධිපතිවරයාගේ මෙම මත විමසුම පිළිබඳ විභාගයේ නීතිපතිගේ ස්ථාවරය වන්නේ සීමානිර්ණ වාර්තාවක් නොමැතිව පළාත් සභා මැතිවරණයක් පැවැත්විය නොහැකි බවත්, පැරණි පනත අනුව පළාත් සභා මැතිවරණය පැවැත්විය නොහැකි බවද නීතිපති වෙනුවෙන් පෙනී සිටි අතිරේක සොලිසිටර් ජනරාල් ජනාධිපති නීතිඥ ඉන්දිකා දේමුණි ද සිල්වා මහත්මිය අධිකරණයට දැන්වූවාය.
ඇය වැඩිදුරටත් කියා සිටියේ නීතිපතිවරයා සහ අනෙකුත් පාර්ශවකරුවන් එකම ස්ථාවරයක සිට කරුණු දැක්වූ ප්‍රථම අවස්ථාව මෙය වන බවය.
ජනාධිපතිවරයාගේ මෙම අයැදුම්පතට අතරමැදි පෙත්සම් කිහිපයක්ද ශ්‍රේෂ්ඨාධිකරණයට ඉදිරිපත් කර තිබූ අතර එම අතරමැදි පෙත්සම්කරුවන් වෙනුවෙන් නීතිඥවරු කරුණු දැක්වූ අතර ඔවුන් සියලු දෙනා සඳහන් කර සිටියේ පළාත් සභාවල සීමා නිර්ණය පිළිබඳ කමිටු වාර්තාව පාර්ලිමේන්තුව මඟින් සම්මත කර නොමැති අවස්ථාවක පළාත් සභා මැතිවරණයක් පැවැත්විය නොහැකි බවය.
නමුත් අතරමැදි පෙත්සම්කාර නීතිඥ දසුන් නාගසේන වෙනුවෙන් පෙනී සිටි ජනාධිපති නීතිඥ විජයදාස රාජපක්ෂ මහතා කියා සිටියේ සීමා නිර්ණය වාර්තාව නොමැතිව පළාත් සභා මැතිවරණය පැවැත්විය නොහැකි වුවත්, එය පැරණි ක්‍රමය යටතේ පැවැත්වීමේ නීතිමය ප්‍රතිපාදන පවතින බවය.
අතරමැදි පෙත්සම්කාර පාර්ශ්වවල කරුණු දැක්වීමෙන් අනතුරුව නීතිපති වෙනුවෙන් පෙනී සිටින අතිරේක සොලිසිටර් ජනරාල් ඉන්දිකා දේමුණි ද සිල්වා මහත්මිය කියා සිටියේ ජනාධිපතිවරයා විසින් ශ්‍රේෂ්ඨාධිකරණය වෙත යොමු කළ මත විමසුම පිළිබඳ ප්‍රශ්න තුන සම්බන්ධයෙන් නීතිපතිගේ පිළිතුර වන්නේ සීමා නිර්ණය වාර්තා නොමැතිව පළාත් සභා මැතිවරණ පැවැත්විය නොහැකි බවත්, මීට අමතරව පැරණි පනත අනුවද මැතිවරණය පැවැත්විය නොහැකි බවත්ය.
