(දයාසීලි ලියනගේ)
මුදල් අමාත්‍යංශයේ එකඟතාවකින් තොරව පළාත් සභාවක හිටපු ඇමැතිවරුන්ගේ හා මන්ත්‍රීවරුන්ගේ කාර්ය මණ්ඩල සඳහා පාරිතෝෂික දීමනා ලෙසට රුපියල් ලක්ෂ 88ක මුදලක් ගෙවා ඇති බව අනාවරණය වේ.
පළාත් සභා මන්ත්‍රීවරයකුට කාර්ය මණ්ඩලය සඳහා තිදෙනෙක්ද ඇමැතිවරයකුගේ කාර්ය මණ්ඩලය සඳහා අට දෙනෙක්ද සේවය කර ඇත.
පළාත් සභාව විසුරුවා හැර වසර 4ක කාලයක් ඉකුත් වී ඇති අතර මේ අයට පාරිතෝෂික දීමනාවක් වශයෙන් මෙම මුදල පසුගිය මාස කිහිපය තුළදී ගෙවා ඇති බව මුදල් අමාත්‍යංශ ප්‍රකාශකයෙක් කීය.
ආණ්ඩුකාරවරයාගේ අනුමැතිය මත පමණක් මෙම මුදල් ගෙවා ඇත.
මෙම ගෙවීම පූර්වාදර්ශයක් කර ගනිමින් අනෙකුත් පළාත් සභාවල ඇමැති හා මන්ත්‍රී කාර්ය මණ්ඩල සඳහා ද මෙම පාරිතෝෂික දීමනාව ගෙවන ලෙසට බලපෑම් එල්ල වී ඇතැයි ද එම ප්‍රකාශකයා සඳහන් කළේය.
මුදල් අරපරිස්සමින් වියදම් කරන ලෙසට රජය තරයේ උපදෙස් දී තිබියදී මුදල් අමාත්‍යංශයේ විරෝධය නොතකමින් මෙම මුදල් ගෙවීම පිළිබඳව වහාම පියවර ගැනීමට තීරණය කර ඇතැයි එම ප්‍රකාශකයා වැඩිදුරටත් කීය.
