- උතුරු ඇමෙරිකානු තේ සමුළුවේදී අවිස්සාවේල්ල සහ හිදැල්ලන තේ කර්මාන්තශාලා ජාත්‍යන්තර ඇගයීමට
ශ්‍රී ලංකාවේ ලෝක ප්‍රකට “සිලෝන් තේ” නාමය ජාත්‍යන්තර තේ වෙළෙඳපොළේ තවදුරටත් ඉහළට ඔසවා තැබීමට සමත් වූ සුවිශේෂී අවස්ථාවක් ලෙස, RTS Holdings සමූහයට අයත් අවිස්සාවේල්ල තේ කර්මාන්තශාලාව සහ හිදැල්ලන තේ කර්මාන්තශාලාව ජාත්‍යන්තර ඇගයීම් දෙකක් හිමිකර ගැනීම සඳහන් කළ හැකිය.
2026 සැප්තැම්බර් 22 සිට 24 දක්වා කැනඩාවේ නයගරා-ඔන්-ද-ලේක් ප්‍රදේශයේ පැවති උතුරු ඇමෙරිකානු තේ සමුළුව අතරතුර පැවැති තේ තරගය සහ තිරසාරත්ව ඇගයීම්වලදී මෙම සුවිශේෂී ජයග්‍රහණ දෙක හිමි විය.
අවිස්සාවේල්ල තේ කර්මාන්තශාලාවට ශ්‍රී ලංකා අංශයේ දෙවැනි ස්ථානය
RTS Holdings සමූහයට අයත් අවිස්සාවේල්ල තේ කර්මාන්තශාලාව - සිතක විසින් ඉදිරිපත් කරන ලද FBOP (Flowery Broken Orange Pekoe) කළු තේ, තේ තරගයේ ශ්‍රී ලංකා අංශයේ දෙවැනි ස්ථානය හිමිකර ගැනීමට සමත් විය.
ජාත්‍යන්තර මට්ටමේ තේ තරගයකදී මෙවැනි ඇගයීමක් හිමිවීම, ශ්‍රී ලංකාවේ තේ නිෂ්පාදකයන්ගේ ගුණාත්මකභාවය සහ තේ නිෂ්පාදන ක්ෂේත්‍රයේ පවතින ශිල්පීය නිපුණතාව පිළිබඳ වැදගත් පිළිගැනීමකි.
FBOP වැනි උසස් තත්වයේ කළු තේ නිෂ්පාදනය සඳහා අමු තේ දලු තෝරාගැනීමේ සිට කර්මාන්තශාලාව තුළ සිදු කරන සෑම නිෂ්පාදන පියවරක්ම ඉතා වැදගත් වේ. දලු‍වල ගුණාත්මකභාවය, නිසි withering ක්‍රියාවලිය, rolling සහ fermentation තත්ත්වයන්, drying, grading සහ අවසාන නිෂ්පාදනයේ පෙනුම, සුවඳ, රසය සහ liquor quality වැනි කරුණු අවසාන තේ නිෂ්පාදනයේ ප්‍රමිතිය තීරණය කරයි.
එබැවින් මෙම ජයග්‍රහණය එක් තරගයකින් ලැබුණු සම්මානයකට පමණක් සීමා නොවී, තේ නිෂ්පාදනයේ සෑම අදියරකදීම ගුණාත්මකභාවය ආරක්ෂා කිරීමට කර්මාන්තශාලාව දරන අඛණ්ඩ උත්සාහයට ලැබුණු ජාත්‍යන්තර ඇගයීමක් ලෙස සැලකිය හැකිය.
හිදැල්ලන තේ කර්මාන්තශාලාවට තිරසාරත්වය වෙනුවෙන් ඇගයීමක්
මේ අතර හිදැල්ලන තේ කර්මාන්තශාලාව (පෞද්ගලික) සමාගම විසින් තේ කර්මාන්තය තුළ ක්‍රියාත්මක කරනු ලබන තිරසාර වැඩසටහන් වෙනුවෙන් 2026 තිරසාරත්ව සම්මාන ඇගයීම් සහතිකයක් හිමිකර ගැනීම ද RTS Holdings සඳහා තවත් වැදගත් ජයග්‍රහණයකි.
මෙවර තිරසාරත්ව ඇගයීමේ තේමාව වූයේ,“තිරසාර අද දවසක් - අභියෝගවලට ඔරොත්තු දෙන හෙට දවසක්”
යන්නයි.
වර්තමාන තේ කර්මාන්තය මුහුණ දෙන දේශගුණික විපර්යාස, බලශක්ති පිරිවැය, ජල භාවිතය, අපද්‍රව්‍ය කළමනාකරණය, පරිසර ආරක්ෂාව සහ තේ වගාකරුවන්ගේ ආර්ථික ස්ථාවරත්වය වැනි අභියෝග හමුවේ තිරසාර ක්‍රියාමාර්ගවල වැදගත්කම දිනෙන් දින වැඩිවෙමින් පවතී.
හිදැල්ලන තේ කර්මාන්තශාලාව විසින් පරිසර ආරක්ෂාව, පුනර්ජනනීය බලශක්ති භාවිතය, සම්පත් කාර්යක්ෂමතාව, තේ වගාකරුවන් සමග සම්බන්ධතා සහ සමාජීය වගකීම් ඇතුළු ක්ෂේත්‍ර ගණනාවක් සම්බන්ධයෙන් වැඩසටහන් ක්‍රියාත්මක කරමින් සිටී.
මෙවැනි වැඩසටහන් තුළින් තේ කර්මාන්තයේ ව්‍යාපාරික සාර්ථකත්වය පමණක් නොව, පරිසරය, ප්‍රජාව සහ අනාගත පරපුර වෙනුවෙන් වගකීමෙන් යුතුව කටයුතු කිරීමේ වැදගත්කමද RTS Holdings අවධාරණය කරයි.
ජයග්‍රහණය පිටුපස සිටින කුඩා තේ වතු හිමියෝ
මෙම ජාත්‍යන්තර ඇගයීම් දෙකෙහිම ගෞරවය කර්මාන්තශාලා කළමනාකාරිත්වයට සහ සේවක කණ්ඩායමට පමණක් සීමා නොවේ. RTS Holdings සමග දිගුකාලීනව සම්බන්ධ වී සිටින තේ කුඩා වතු හිමියන් දහස් ගණනක් මෙම සාර්ථකත්වයේ අත්‍යවශ්‍ය කොටස්කරුවෝ වෙති.
හොඳ තත්වයේ අමු තේ දලු නිසි වේලාවට සහ නිසි ප්‍රමිතියෙන් කර්මාන්තශාලාව වෙත ලබාදීම අවසාන තේ නිෂ්පාදනයේ ගුණාත්මකභාවය සඳහා මූලික පදනම වේ. එම නිසා ජාත්‍යන්තර තේ තරගයකදී ශ්‍රී ලංකා තේ සඳහා ලැබෙන සෑම ඇගයීමක් පිටුපසම තේ වගාකරුවාගේ කැපවීම, ඔහුගේ පවුලේ ශ්‍රමය සහ වසර ගණනාවක් පුරා තේ වගාව රැකගෙන පැමිණීමේ උත්සාහයද පවතී.
මෙම ජයග්‍රහණය එබැවින් RTS Holdings, කර්මාන්තශාලා සේවකයන්, තේ කුඩා වතු හිමියන් සහ සමස්ත ශ්‍රී ලාංකික තේ කර්මාන්තය එක්ව ලබාගත් සාමූහික ජයග්‍රහණයක් ලෙස හැඳින්විය හැකිය.
“සිලෝන් තේ” නාමය තවදුරටත් ශක්තිමත් කිරීම
ශ්‍රී ලංකාව ලොව පුරා ප්‍රසිද්ධ වී ඇත්තේ උසස් තත්වයේ “Ceylon Tea” නිෂ්පාදනය කරන රටක් ලෙසය. එම කීර්තිමත් නාමය ආරක්ෂා කිරීම වර්තමාන තේ කර්මාන්තයේ සියලු පාර්ශ්වයන්ගේ වගකීමකි.
ජාත්‍යන්තර වෙළෙඳපොළේ පාරිභෝගිකයන්ගේ අවශ්‍යතා වෙනස් වෙමින් පවතින අතර, රසය සහ ගුණාත්මකභාවයට අමතරව පරිසර හිතකාමී නිෂ්පාදන ක්‍රම, තිරසාර සැපයුම් දාම, සමාජීය වගකීම සහ විශ්වාසනීය නිෂ්පාදන ක්‍රියාවලිය සඳහා ද වැඩි අවධානයක් යොමුවෙමින් පවතී.
එවැනි පසුබිමක, ගුණාත්මක තේ නිෂ්පාදනය සහ තිරසාර ව්‍යාපාරික ක්‍රියාමාර්ග එකට ගෙන යාම RTS Holdings හි ඉදිරි ගමනේ වැදගත් අංගයක් බව මෙම ජාත්‍යන්තර ඇගයීම් මගින්ද පැහැදිලි වේ.
ඉදිරි ගමන
මෙම ජයග්‍රහණ දෙක RTS Holdings සඳහා අවසාන ඉලක්කයක් නොව, තවදුරටත් උසස් ප්‍රමිතියෙන් යුත් තේ නිෂ්පාදනය කිරීමටත්, නව වෙළෙඳපොළ අවස්ථා සොයා ගැනීමටත්, තේ කුඩා වතු හිමියන් සමග වඩාත් ශක්තිමත් සම්බන්ධතාවක් ගොඩනගා ගැනීමටත් ලැබුණු දිරිගැන්වීමකි.
ඒ සමගම පරිසර හිතකාමී සහ තිරසාර නිෂ්පාදන ක්‍රම තවදුරටත් පුළුල් කරමින්, ශ්‍රී ලංකාවේ තේ කර්මාන්තයට දිගුකාලීන ආර්ථික හා සමාජීය වටිනාකමක් නිර්මාණය කිරීම ද ඉදිරි අරමුණකි.
2026 සැප්තැම්බර් මාසයේ කැනඩාවේදී ලැබුණු මෙම ජාත්‍යන්තර ඇගයීම් දෙක, RTS Holdings හි ගමන් මඟේ තවත් වැදගත් සන්ධිස්ථානයක් පමණක් නොව, ශ්‍රී ලංකාවේ “සිලෝන් තේ” නාමය වෙනුවෙන් කැපවී සිටින සියලු දෙනාටම අභිමානයක් ගෙන දෙන අවස්ථාවකි.
මෙම සාර්ථකත්වය සඳහා දායක වූ RTS Holdings කණ්ඩායමට, අවිස්සාවේල්ල සහ හිදැල්ලන තේ කර්මාන්තශාලාවල සියලු‍ම සේවකයන්ට, කළමනාකාරිත්වයට සහ විශේෂයෙන්ම නිරන්තරයෙන් උසස් තත්වයේ අමු තේ දලු සපයන සියලු‍ම තේ කුඩා වතු හිමියන්ට අපගේ උණුසුම් සුබ පැතුම් පිරිනමමු.
