(විමුක්ති එස් රුද්‍රිගු)
ඉරානය පසුගියදා ඊශ්‍රායලයට එල්ල කළ බැලස්ටික් මිසයිල ප්‍රහාරයට පිළිතුරු ලෙස ඉරාන තෙල් පිරිපහදුවලට පහර දීම පිළිබඳව සාකච්ඡා කළ බවත් කෙසේ වෙතත් එම ප්‍රහාරය ඊයේ (03) එල්ල නොවෙනු ඇති බවත් ඇමෙරිකා ජනාධිපති ජෝ බයිඩන් ධවල මන්දිරයේ පැවැති මාධ්‍ය හමුවකදී ප්‍රකාශ කළේය.
ඊශ්‍රායලය ඉරාන තෙල් පිරිපහදුවලට පහර දීම අනුමත කරනවාද යැයි මාධ්‍යවේදියෙකු නැගූ ප්‍රශ්නයකට පිළිතුරු දෙමින් ඇමෙරිකා ජනාධිපතිවරයා මෙම අදහස් පළ කළේය.
ජනපති බයිඩන්ගේ මෙම ප්‍රකාශයත් සමග ලෝක බොරතෙල් වෙළඳපොළේ බොරතෙල් බැරලයක මිල සියයට 5 ක ප්‍රතිශතයකින් අද(03) ඉහළ ගියේය. මෑතකදී ඇමෙරිකාව ලබාදුන් උපදෙස්වලට ඊශ්‍රායල වැඩි අවධානයක් යොමු නොකළත් ඉරානයට එල්ල කරන ප්‍රහාරය හදිසියේ සිදු නොකරනු ඇතැයි තමන් විශ්වාස කරන බව ජනපතිවරයා ප්‍රකාශ කළේය.
ඇමෙරිකාව ඊශ්‍රායලයට උපදෙස් ලබාදීම පමණක් සිදුකරන බවද ඔහු පැවැසුවේය. ඉරාන න්‍යෂ්ටික මධ්‍යස්‌ථාන වෙත ප්‍රහාර එල්ල කිරීමට ඊශ්‍රායලයට සහාය ලබා නොදෙන බව ජනපති බයිඩන් ඊයේ(02) ප්‍රකාශ කළේය.
බොරතෙල් මිල ඉහළ යාම ඉදිරියේදී පැවැත්වෙන ඇමෙරිකානු ජනාධිපතිවරණයේදී උප ජනාධිපති හැරිස්ට අවාසියක් විය හැකි බවද දේශපාලන විචාරකයෝ පැවැසූහ.
