(හිරාන් ප්‍රියංකර ජයසිංහ)
උඩප්පුව ධීවර ගම්මානය දරුණු ලෙස මුහුදු ඛාදනයට ලක් විම නිසා ධීවර වාඩි දහයකට වැඩි ප්‍රමාණයක් විනාශ වි ඇති බව ධීවරයෝ පවසති.
පසුගිය දිනවල පැවැති දරුණු මුහුදු රළ හා සුළඟ හේතුවෙන් උඩප්පුව වෙරළ තීරයේ තිබු ස්ථිර හා තාවකාලික ධීවර වාඩි 10කට වැඩි ප්‍රමාණයක් සම්පූර්ණයෙන්ම විනාශ වී ඇති අතර ඒ සමගම උඩප්පුව වෙරළ මාර්ගය දසම්පුර්ණයෙන් විනාශ වි ඇත.
ධීවරයකු වන අන්තෝනී සුසේපාලේයි මහතා මෙසේ අදහස් දක්වන්නට විය.
“අපි දන්න කාලයකින්වත් ආපු නැති සුළඟක් වාගේම මුහුදු රළක් ආවේ. දවස් දෙකට තුනට මීටර් 20කට වැඩි ප්‍රමාණයක් එකපාරම වෙරළ කඩාගෙන ගියා හිතාගන්න බැරිවිදිහට. මේ තරම් ලොකු හානියක් අපි දන්න කාලයකින් වෙලා නැහැ. දැන් බෝට්ටුවක් මුහුදට දාන්නත් බැහැ. ගන්නත් බැහැ "යැයි ඔහු පැවසීය.
මෙහිදි අදහස් දක්වමින් සිටි ධීවර කාන්තාවක් වන වී. අහල්යා මහත්මිය මෙවැන්නක් පැවසුවාය.
“ අපේ ධීවර වාඩි සේරම මුහුදට කඩලා ගියා. දැන් එවා හදාගන්න බැහැ සල්ලි තිබුණත්. මොකද දැන් වෙරළක් ඉතිරි වෙලා නැති නිසා. දවස් දෙකට තුනට මේ සේරම විනාශ වුනා අපි දැන් අන්ත අසරණයි. මොනවා කරන්නද කියලා හිතාගන්න අමාරුයි. හෙට මුහුද සැර අඩුවුණාම කොහොම බෝට්ටුවක් දාගන්නද කියලා තමයි මේ මිනිස්සු කල්පනා කරන්නේ‘‘ යැයි ඇය කනස්සල්ලෙන් පැවසුවාය.
මුන්දලම ප්‍රාදේශීය ලේකම් විජානි වසන්තිකා මහත්මිය පවසා සිටියේ මෙවැන්නකි.
“උඩප්පුවේ සිදුවුන හානි ගැන අපේ ග්‍රාම නිළධාරි ඒ එක්කම ආපදා සහන නිලධාරීන් මට දන්වා තිබෙනවා. මම පුළුවන් තරම් ඉක්මනට මේ ධීවරයින්ට අදාල අංශ සමග කථා කරලා සහන ලබා දෙන්න කඩිනමින් කටයුතු කරනවා. ඇත්තටම ස්තුතියි මාව දැනුවත් කලාට. මම ඉක්මණට මේ පිරිස නැවත හමුවෙලා කථා කරන්නම්" යැයි ඇය පැවසුවාය.
