සිතුම් චතුරංග
විදේශගතව පැමිණ ඉරණමඩු ගුවන් හමුදා කඳවුරේ නිරෝධායනය වෙමින් සිටි පුද්ගලයින් 172 ක් සාර්ථකව නිරෝධායනය අවසන් කර අද (4) ගම්බිම් බලා පිටව ගිය බව ඉරණමඩු ගුවන් හමුදා කඳවුරේ අණදෙන නිලධාරී ගෘප් කපිතාන් රොහාන් පතිරණ මහතා පැවසීය.
මෙම පිරිස පසුගිය මාර්තු 20 වැනිදා විශේෂ ගුවන් යානයකින් ඉන්දියාවේ සිට මෙරටට පැමිණ ඇති අතර එලෙස පැමිණි පුද්ගලයින් දින 14ක කාලයක් සාර්ථකව නිරෝධායනය අවසන් කොට එලෙස පිටව යන බව පැවසීය.
කොවිඩ් 19 රෝගය පැතිරවීම වැළැක්වීම සඳහා රජය ගෙනයන වැඩපිළිවෙලට සහයෝගය දීම සඳහා ශ්‍රී ලංකා ගුවන් හමුදාවේ මැදිහත් වීම මත ගුවන් හමුදා කඳවුරු කිහිපයක නිරෝධායන මධ්‍යස්ථාන ස්ථාපිත කොට පුද්ගලයින් නිරෝධායනය සඳහා යොමුකළ බවත් එහිදී ඔවුන්ට අවශ්‍ය පිසූ ආහාර ද්‍රව්‍ය , වයිෆයි ඇතුළු දුරකථන පහසුකම් හා සනීපාරක්ෂක පහසුකම් සියල්ල ලබාදුන් බවද සඳහන් කළේය.
මෙලෙස නිරෝධායනයට පැමිණි පුද්ගලයින්ගෙන් වැඩි පිරිසක් දඹදිව වන්දනාවේ ගොස් සිටි පුද්ගලයින් බවත් ඔවුන් අතරින් බහුතරයක් වයෝවෘද පුද්ගලයින් වන බැවින් ඔවුන් හට තිබූ විවිධවූ නිදන්ගත රෝග සඳහා ඖෂධ නොතිබීමෙන් ගුවන් හමුදාව විසින් ඒ සඳහා විශේෂ වැඩපිළිවෙලක් සකස්කොට ඔවුනට පැය 24 කාලයම අවශ්‍ය විශේෂ වෛද්‍ය පහසුකම් ලබාගැනීමට හැකිවන පරිදි වෛද්‍ය ඒකකයක්ද පිහිටුවීමට කටයුතුකරනු ලැබු බවද කීය.
විශේෂයෙන් මේ සඳහා කිලිනොච්චිය ආරක්ෂක සේනා මූලස්ථානය , කිලිනොච්චිය පොලිසිය හා අනෙකුත් රාජ්‍ය ආයතන වලින් විශේෂ සහයෝගයක් ලැබීම හේතුවෙන් මෙම පිරිස සාර්ථකව නිරෝධායනයට යොමුකර ගම්බිම් බලා පිටත්කිරීමට හැකිවූ පැවසූ අතර ඔවුන් තවදුරටත් නිවෙස්තුල දින 14 කාලයක් ස්වයං නිරෝධායනයට ලක්කිරීමට අවශ්‍ය පියවර ගෙන ඇතැයිද ඉණමඩු ගුවන් හමුදා කඳවුරේ අණදෙන නිලධාරීවරයා වැඩිදුරටත් පැවසීය.
