(ඉංගිරිය - නිමාලි කහවල සහ බණ්ඩාරගම - බිමල් ශ්‍යාමන් ජයසිංහ)
“අපි දේශපාලනය දන්න මිනිස්සු. මේ රටේ ජාතිවාදීන්ට ආගම්වාදීන්ට මේ රටේ පොදු ජනතාව අත්කරදුන් ඉරණම ගැන අපිට හොඳ අවබෝධයක් තිබෙනවා. අපේ රජයේ ප්‍රජාතන්ත්‍රවාදී දේශපාලනය කරන සියලු දෙනාගේ කැමැත්ත තමයි ගෝඨාභය රාජපක්ෂ මහත්තයා ඒකාබද්ධ විපක්ෂයේ පොහොට්ටුවේ පොදු අපේක්ෂකයා ලෙස ජනාධිපතිවරණයට එන එක” යැයි විදුලිබල හා පුනර්ජනනීය බලශක්ති රාජ්‍ය අමාත්‍ය අජිත් පී. පෙරේරා මහතා ඉකුත්දා පැවසීය. බණ්ඩාරගම එක්සත් ජාතික පක්ෂ ප්‍රධාන කාර්යාලයේ පසුගියදා පැවති පක්ෂ ක්‍රියාකාරීන්ගේ ජන හමුවක් අමතමින් ඒ මහතා එසේ කීය.
එහිදී රාජ්‍ය අමාත්‍යවරයා අදහස් දක්වමින් මෙසේ ද කීවේය.
“හුඟක් දෙනෙක් කතා කරනවා ගෝඨාභය රාජපක්ෂ මහත්මයාට ඇමරිකන් පුරවැසිකම ඉවත්කරගන්න තිබෙන අමාරුකම ගැන. ඉතින් අපි කිව්වද එතුමාට ඇමරිකන් පුරවැසිකම ගන්න කියලා. ඇමරිකන් පුරවැසිකම අරගෙන, ඇමරිකන් පුරවැසියෙක් ලෙස දිවුරුම් දීලා, ඇමරිකන් ව්‍යවස්ථාවට අතගහලා මම ඇමරිකන් පුරවැසියෙක් කියලා ආඩම්බරකමට කියපු මනුස්සයෙක් දැන් අඬලා වැඩක් නැහැ, ‘මේ මගේ පුරවැසිකම මේගොල්ලො අතහරින්නෙ නැහැනෙ, මගේ මේ පුරවැසිකම අතහැරලා මට ඡන්දෙ ඉල්ලන්න දෙන්නෙ නැහැනෙ’ කියලා. පරාද කරන්න බැහැ කියපු මහින්ද රාජපක්ෂවත් අපි 2015 දී පරාජය කළා. මේ රටේ තිබෙන ප්‍රශ්න වගේම මේ රටේ ඡන්දදායකයාගේ හැසිරීම ගැනත් අපිට හොඳ අවබෝධයක් තිබෙනවා.
එසේම පසුගිය දිනවල අර ගලගොඩඅත්තේ ඥානසාර හාමුදුරුවෝ මේ රටේ නීතියේ ආරක්ෂාව සපයන අධිකරණයකට ගිහිල්ලා ඒ අධිකරණයට අභියෝග කරලා පැමිණිලිකාරයාට තර්ජනය කරලා මහා ගාලගෝට්ටියක් ඇතිකළා. මම ඇත්ත වශයෙන්ම කනගාටු වෙනවා බෞද්ධ භික්ෂූන් වහන්සේ කෙනකුට සිර දඬුවමක් නියම කිරීම ගැන. එය අපි හැමෝටම කනගාටුවට හේතුවක්. හැබැයි මේ රටේ නීතිය ඉස්සරහ ගිහියෙක් වුණත්, භික්ෂුවක් වුණත් මොන තරාතිරම දැරුවත් රටේ නීතියට යටත් විය යුතුයි. ඒ සියලු දෙනාටම නීතිය එක හා සමානව ක්‍රියාත්මක විය යුතුයි.
හැබැයි මේ රටේ හැමෝම හඬ නඟන්න ඕනෑ ඥානසාර හාමුදුරුවන්ට නීතිය ක්‍රියාත්මක කළා වගේ එක්නැලිගොඩ මරපු, එක්නැලිගොඩ මරන්න කුමන්ත්‍රණය කළ අයටත් ඒ හා සමානව නීතිය ක්‍රියාත්මක කළ යුතුයි කියා. අපි ඒ ගැන ආණ්ඩුවටම බලකරන්න ඕනෑ. නීතිය සමානව ක්‍රියාත්මක වීම ගැන මිනිසුන්ට හැඟීමක් ඇතිවෙන්නෙ එතකොට. අපි අධිකරණයේ ගෞරවය ආරක්ෂා කළයුත්තේ අධිකරණ භූමිය තුළ පමණක් නොවෙයි, ඒ මුළු වටපිටාව තුළම ඒ ගෞරවය ආරක්ෂා කරගත යුතුයි. අපරාධ වින්දිතයන්ට, සාක්ෂිකාරයන්ට, ඒ වගේම වරදකට අත්අඩංගුවට ගත් සැකකරුට, විත්තිකරුට පවා ඒ නීතියේ රැකවරණය එක ලෙස ලබාදිය යුතුයි” යැයි ද පැවසීය.
