නාලක සංජීව දහනායක
මැතිවරණ වලට බිය නැත්නම් අලූත් හෝ පැරණි මනාප ක‍්‍රමය හෝ ආණ්ඩුව කැමති ඕනෑම ආකාරයකට මැතිවරණ පවත්වන ලෙස ආණ්ඩුවට අභියෝග කරන බව ඒකාබද්ධ විපක්‍ෂයේ කැඳවුම්කරු පාර්ලිමේන්තු මන්ත‍්‍රී ප‍්‍රසන්න රණතුංග මහතා පැවසීය.
ප‍්‍රජාතන්ත‍්‍රවාදයේ නමින් බලයට ආ රනිල්-මෛත‍්‍රී ආණ්ඩුවට දැන් මැතිවරණ නම ඇසුණත් කකුල් පණ නැති වී සුළු දිය පහවන තත්ත්වයක් ඇතිවී තිබෙන බවද මන්ත‍්‍රීවරයා කීය.
එහිදී මන්ත‍්‍රීවරයා මෙසේද කීය.
අද රට පාලනය කරන්නේ අපේ රටේ ඉතිහාසයේ පත්වෙච්ච අසාර්ථකම ආණ්ඩුව බවට කතා දෙකක් නැහැ. මේ ආණ්ඩුව බලයට ඇවිත් අවුරුදු තුනක් යනකොට රට හැමපැත්තකින්ම විනාශ වුණා. ආර්ථිකය, සංවර්ධනය, ආරක්ෂාව වගේ හැම අංශයකින්ම රට පහළට වැටුණේ ජනාධිපතිවරයා ඇතුළු ආණ්ඩුවේ අසාර්ථකකම නිසයි.
මේ ආණ්ඩුව බලයට ආවේ ප්රජාතන්ත්රවාදය, යහපාලනය, මානව අයිතිය ගැන ලොකු ලොකු කතා කියමිනුයි. එදා ඒ කිව්ව යහපාලනය අද ආණ්ඩුවේ රෙද්ද පල්ලෙන් බේරෙන්න අරගෙන. ප්රජාතන්ත්රවාදය කොයිතරම්ද කියනවා නම් ඡන්ද කිව්ව ගමන් ආණ්ඩුවේ කකුල් ගැහෙන්න ගන්නවා. සුළුදිය පහවෙනවා.
පළාත් පාලන ආයතන ඡන්දය අවුරුදු දෙකක් කල්දැම්මා. අන්තිමට ඡන්දය තිබ්බේ රටෙන් ආපු බලපෑම තවදුරටත් ඉවසන්න බැරි තැනයි. දැන් පළාත් පාලන ඡන්දය කල්දාන්න පටන් අරගෙන තියෙනවා. පළාත් සභා තුනක කාලය ඉවර වෙලා මේ සැප්තැම්බර් මාසයට අවුරුද්දක් සම්පූර්ණ වෙනවා. හැබැයි තාම ඡන්දය තියන්න උනන්දුවක් නැහැ.
