විපක්ෂ නායකවරයා සිසුන් කිහිපදෙනකුට පොත් ප්‍රදානය කළ අයුරු
(බණ්ඩාරගම - බිමල් ශ්‍යාමන් ජයසිංහ)
මගෙන් හා මගේ පවුලේ අයගෙන් විතරක් පළිගැනීම ඉස්සරහට දාගෙන හදිස්සියේ 19 වැනි සංශෝධනය ගෙන ආ බවත් අවසානයේදී ජනාධිපතිවරයා රවට්ටා 19 වන සංශෝධනය සම්මත කර ගත් බවත් විපක්ෂ නායක මහින්ද රාජපක්ෂ මහතා පැවසීය.
බණ්ඩාරගම ප්‍රාදේශීය සභාවේ වර්ෂ පූර්ණය නිමිත්තෙන් අලුබෝමුල්ල එස්. මහින්ද මහ විදුහලේ පැවති සිසු උදාන අධ්‍යාපන හා වෙළෙඳ ප්‍රදර්ශන සැණකෙළියට සහභාගි වූ අවස්ථාවේ විපක්ෂ නායකවරයා මේ බව පැවසීය.
පාසල් දරු දැරියන් 500 දෙනකුට පාසල් පොත් සහ පාසල් උපකරණ බෙදාදීමද මෙහිදී සිදුවිය.
විපක්ෂ නායකවරයා මෙසේද කීය.
පසු පෙළ මන්ත්‍රීවරු බොහොම සංවිධානාත්මකව මේ අයවැයෙන් තුනෙන් එකක් පරාජයට පත් කළා. එක පැත්තකින් තමන්ගේ මන්ත්‍රීවරුන්වත් ගෙන්වා ගන්න බැරි ආණ්ඩුවක් තමයි මේ ආණ්ඩුව. මම දන්නේ නැහැ කොයි විදියට වුණාද කියලා. ආණ්ඩුවට පළමු ප්‍රහාරය එල්ල වුණා. මේක විපක්ෂයේ ලොකු ජයග්‍රහණයක්.
දැන් පළාත් සභා අවුරුදු කීයකට පස්සට දාවිද කියන්න මම දන්නේ නැහැ. ඡන්ද බලය ඉල්ලා අපි අධිකරණයට ගිසා. අධිකරණය අපිට ඡන්ද බලය දුන්නේ නැහැ. අධිකරණය වුණත් ක්‍රියාත්මක වෙන්නේ පාර්ලිමේන්තුව හදන නීති අනුවයි. පාර්ලිමේන්තුව වැරදි නීතියක් හැදුවොත් ඒ නීතියට අධිකරණය යටත්.
පහේ ශිෂ්‍යත්වය නැති කරන්න දැන් කතාවක් ඇතිවෙලා. මගේ නම් මේ පිළිබඳ අදහස් දෙකක් තියෙනවා. පහේ ශිෂ්‍යත්වය නැති කරනවා නම් ගමේ දක්ෂ දරුවන්ට රාජකීය, ආනන්ද, නාලන්ද, විශාඛා හා අනුලා වැනි රටේ ප්‍රධාන විද්‍යාලවලට එන්න වැඩපිළවෙළක් තියෙන්න ඕන.
මේ විනාශය නැති කළොත් ගමේ දරුවන්ට රටේ හොඳම පාසල්වලට යන්න අවස්ථාව නැති වෙන නිසා වෙනත් ක්‍රමයක් හදනවනම් පහේ ශිෂ්‍යත්ව විභාගය අවලංගු කරන්න ඕන කියන එක තමයි මගේ විශ්වාසය. මම හිතනවා ජනාධිපතිවරයාත් එය අනුමත කරාවි කියලා.
විපක්ෂ නායක මහින්ද රාජපක්ෂ මහතා බස්නාහිර පළාත් සභා මන්ත්‍රී ලලිත් එල්ලාවල මහතා සමග සාකච්ඡා කරමින්.
දැන් ගමේ පාසල හොඳම පාසල කියනවා. හොඳම පාසලේ ගොඩනැගිලි නෑ. ගුරුවරු නෑ. ක්‍රීඩා පිට්ටනි නැහැ. අඩුම තරමේ සෙල්ලම් කරන්න වොලිබෝලයක්වත් නැහැ. ශිෂ්‍යත්ව විභාගය නැති වුණොත් අපේ ගමේ දක්ෂ දරුවන්ට ගමේ පාසලටම යන්න වෙනවා. එක පන්තියකට එක කණ්ඩායමකට පමණක් ප්‍රධාන පාසල්වලට යාම සීමා වේවි. ඒ සීමාවට ඉඩ දෙන්න පුළුවන්කමක් නැහැ.
ගමේ දරුවා ගමේ පාසලට දාලා රාජකීය කාටද දෙන්න හදන්නේ. එක පන්තියකට ද මේක පිළිබඳව අපට ප්‍රශ්නයක් තියනවා.
බස්නාහිර පළාත් සභා මන්ත්‍රී ලලිත් එල්ලාවල, බණ්ඩාරගම ප්‍රාදේශීය සභාවේ සභාපති දේවේන්ද්‍ර පෙරේරා මහත්වරුද කතා කළහ.
උත්සවයට සහභාගි වූ පිරිසෙන් කොටසක්
