නාලක සංජීව දහනායක
පුංචි කාර්වලට අධික බද්දක් පනවමින් තාරුණ්‍යයේ සිහින විනාශකර දැමීමට රජය කටයුතු කරමින් සිටින බව පාර්ලිමේන්තු මන්ත‍්‍රී ශෙහාන් සේමසිංහ මහතා අද (2) පැවසීය.
යහපාලන ආණ්ඩුව ජනතාවට සහන ලබදීම වෙනුවට පුරවැසියන්ගෙන් පළිගනිමින් සිටින බවද මන්ත‍්‍රීවරයා කීය.
එහිදී මන්ත‍්‍රීවරයා මෙසේද කීය.
මැතිවරණ කල්දමමින්, ජනතාව මත අධික ලෙස බදුබර පටවමින් සහ බඩු භාණ්ඩවල මිළ ඉහළ දමමින් නමුත් වර්තමාන යහපාලන ආණ්ඩුව පුරවැසියන්ගෙන් පළිගන්නවා. මේ ආණ්ඩුවෙන් ජනතාවට කිසිම සහනයක් බලාපොරොත්තුවෙන්න බැහැ.
ආණ්ඩුව බලය ගන්න ජනතාවට නොයෙක් ආකාරයේ පොරොන්දු දුන්නා. පුංචි කාර් සිහිනය, ෆ‍්‍රී වයි, රැකියා දස ලක්‍ෂයක් දීම, ෆොක්ස් වැගන් කර්මාන්තශාලාව වැනි තරුණ පරපුර ආකර්ෂණය වන බොහෝ පොරොන්දු දුන්නා. නමුත් දැන් ආණ්ඩුවට ඒ පොරොන්දු අමතක වෙලා. පොරොන්දුවලට වෙච්ච දෙයක් නැහැ. විශේෂයෙන්ම තරුණ පරපුර බලාපොරොත්තුවක් වූ පුංචි කාර් සිහිනය අද සැබෑ නොවන සිහිනයක් වෙලා. ජනතාව මත අධික බදු පටවමින් මේ ආණ්ඩුව වාර්තාපිට වාර්තා පිහිටුවා තිබෙනවා.
ඒකාබද්ධ විපක්‍ෂය බොරැල්ල, ආචාර්ය එන්.එම් පෙරේරා කේන්ද්‍රයේ අද (2) පැවැත්වූ මාධ්‍ය හමුවකට එක් වෙමින් ඒ මහතා මේ බව සඳහන් කළේය.
