වසර පනහක් හෙවත් අඩ සියවසක් යනු සුළු පටු කාලයක් නොවේ. ඒ ගෙවී ගිය කාලයේදී මෙරට සංගීත ක්ෂේත්‍රය වෙනුවෙන් ඔහු කළ නිර්මාණ දස දහස් ගණනාවකි. මිනිසකු හට එලෙසින් නිර්මාණ කළ හැකිද යන්න විටෙක අදහාගත නොහැකි තරම්ය. පටන් ගත් දින සිට මේ දක්වා සක්‍රීයව සිටිමින් වත්මන් පරපුර දක්වා ඔහු උපද්ද වූ ගී තනු වඩාත් වින්දනීය මෙන්ම අර්ථ රසයෙන් පූර්ණය.
ලාංකීය සංගීතඥයකු ලෙස ඔස්ට්‍රේලියාවේ සිඩ්නි ඔපෙරා හවුස්හි ප්‍රසංගයක් කිරීමට අවකාශය ලබා ගත් එකම ශ්‍රී ලාංකිකයා වන්නේ ද ඔහුය. එය අතිශය විරල අවස්ථාවක් වන්නේ සිඩ්නි ඔපෙරා හවුස් යනු ජාත්‍යන්තර මට්ටමින් ඉහළ තලයේ ප්‍රසංග පැවැත්වෙන රඟහලක් වන බැවිනි. යුග-යුග හද බැඳි ඒ මහා ගාන්ධර්වයා ආචාර්ය රෝහණ වීරසිංහයන්ය. ඔහුගේ සුමියුරු ගී තනුවකට හඬ මුසුකරමින් ගායන ලොවට මල්වර වී ජනප්‍රිය වූ තරු දහස් ගණනකි. එනයින් තරු බිහි කළ මහා තරුව ඔහුම වේ. ඒ මහා කලාකරුවාගේ භාවපූර්ණ, රස පූර්ණ, වින්දනීය ගමනට පනස් වසරක් සපිරි මේ මොහොතේ ඔහු වෙනුවෙන් ඉරිදා ලංකාදීප සඳැල්ල මෙලෙසින් උත්තමාචාර කලාපය වෙන් කරන්නේ අපමණ ගරුත්වයෙනි. ආචාර්ය රෝහණ වීරසිංහයනි, ඔබ රටට ජාතියට වාසනාවකි.
ඔබට චිරං ජයතු !
