සුන්දර දක්ෂ නිළියක් වගේම දක්ෂ නර්තන ශිල්පිනියක් එක්කයි අද අපි ෆැෂන් ගැන කතා කරන්නේ. විවිධ ටෙලි නිර්මාණ ඔස්සේ, ඔබේ ආලින්දයට එන ඇය රුක්ෂානා දිසානායක
- ෆැෂන් ගැන මොකද හිතෙන්නේ?
ෆැෂන් කියන්නේ කව්රුත් කැමැති දෙයක්. මම හිතන විදියට කොයි විදියට කොහොම ෆැෂන් කළත් යන තැනට ගැළපෙන්න, තමන්ට ගැළපෙන්න ෆැෂන් කරන්න දැන ගන්න ඕනේ.
- උත්සව අවස්ථාවලට මොන වගේ ඇඳුම් ද අදින්නේ?
ඒක උත්සවයේ ස්වභාවය අනුව වෙනස් වෙනවා. සමහර උත්සවවල තීම් එකක් තියෙනවා. ඒ වගේ වෙලාවට තීම් එකට මැච් වෙන්න අඳිනවා. එහෙම තීම් නැත්නම් ඒ අවස්ථාවට ගැළපෙන්න ඇඳුමක් තෝර ගන්නවා. සාරි විලාසිතාවලට මම ගොඩක් කැමැතියි.
- ඇඳුම් තෝරා ගනිද්දී අවධානය දෙන කාරණා මොනව ද?
මට ගැළපෙනවද කියන කාරණාව ගැන හිතනවා. ඒ වගේම පහසුව ගැනත් හිතනවා. මම ඇඳුම් නිර්මාණයන් කර ගන්න ඩිසයිනර්ස්ලා කීප දෙනෙක් ඉන්නවා. ඒ නිසා ගොඩක් වෙලාවට උත්සව අවස්ථාවලදී එයාලාට කියලා නිර්මාණයන් කරව ගන්නවා. එයාලා දන්නවා අවස්ථාවට අනුව මට ගැළපෙන්න ඇඳුම් නිර්මාණයන් කරලා දෙන්න.
- සාමාන්‍ය ගමනක් බිමනක් යද්දී මොන වගේ ඇඳුම් ද තෝරා ගන්නේ.?
සැහැල්ලු පහසු ඇඳුම්. ඩෙනිම් ටී ෂර්ට් වගේම ගවුම්වලටත් කැමැතියි මම.
- ආභරණවලට තියෙන කැමැත්ත?
එහෙම විශේෂම කැමැත්තක් නෑ. ඒත් අඳින ඇඳුමට ගැළපෙන්න ආභරණ පාවිච්චි කරනවා. ඒ දේවල්වලට ලොකු ගණන් වියදම් කරන්නේ නෑ.
- පාවහන්වලට තියෙන කැමැත්ත ?
මගේ ළඟ පාවහන් ලොකු එකතුවක් නෑ. සාමාන්‍ය ගමනට බිමනට නම් සැහැල්ලු සෙරෙප්පු පාවිච්චි කරනවා. උත්සව අවස්ථා, සාරි අඳින අවස්ථාවලදී වගේ නම් අඩි උස සපත්තු පාවිච්චි කරනවා.
- බෑග් විලාසිතා ගැන කිව්වොත්..?
බෑග් විලාසිතා කියලා මම බෑග්වලට මහ ලොකු වියදමක් කරලා බෑග් එකතු කරන කෙනෙක් නෙමෙයි. බෑග් කීපයක් තියෙනවා අවස්ථාවන් අනුව භාවිත කරන්න.
- බ්‍රෑන්ඩඩ් ඇඟලු‍ම්, බෑග් සෙරෙප්පුවලට කැමැති ද?
එහෙම බ්‍රෑන්ඩඩ් දේවල්වල අවශ්‍යතාවක් නෑ මට. ඇඳුම් වුණත්, බෑග් සෙරෙප්පු වුණත් මට ලස්සන නම් මම ගන්නවා. ඒ ඇරෙන්න බ්‍රෑන්ඩ් එක ගැන හිතන්නේ නෑ. මට එහෙම බ්‍රෑන්ඩඩ් දේවල් ගන්න තරම් සල්ලිත් නෑ. අඩු වියදමින් මට ගැළපෙන හොඳ දෙයක් ගන්නයි මම උත්සාහ කරන්නේ.
- ටැටූ පියර්සින් ගැන මොකද හිතන්නේ..?
නරක නෑ. දැනටත් මගේ ඇඟේ ටැටූ එකක් තියෙනවා. මම නිළියක් නිසා, විවිධ චරිත රඟපානකොට, ටැටූ මකනවා වගේ දේවල් කරන්න බෑනේ. ඒ නිසා, ඒ ටැටූ එක මගේ වැඩකටයුතුවලට බාධාවක් නොවෙන විදියටයි තියෙන්නේ.
|
|
 |
- හිසකෙස් විලාසිතාවන්..?
මගේ රැකියාවේ ස්වභාවය අනුව මට නිතර චරිතවලට ගැළපෙන්න හිසකෙස් වෙනස් කරන්න වෙනවා. ඒ නිසා මම කලර් කරනවා වගේ දේවල් නොකරන තරම්. ගොඩක් වෙලාවට චරිතයට ගැළපෙන්න කලර් එක, මෝස්තරය වෙනස් කෙරෙනවා.
 |
 |
- පවනි උමයංගනා
