(මහින්ද නිශ්ශංක)
පළාත් පාලන මැතිවරණයේ ජයග්‍රහණය සැමරීම සඳහා පෙළපාළි පෙරහැරයාම සහ රැස්වීම් පැවැත්වීම අද (11) මධ්‍යම රාත්‍රි 12 තෙක් සම්පූර්ණයෙන් තහනම් බව පොලිස් මාධ්‍ය ප්‍රකාශක පොලිස් අධිකාරි රුවන් ගුණසේකර මහතා පවසයි. 
පළාත් පාලන ආයතන ඡන්ද විමසීම් පනත අනුව මෙම තහනම බල පැවැත්වෙන බව පවසන පොලිස් අධිකාරි ගුණසේකර මහතා, එම නීතිය උල්ලංඝනය කරන පුද්ගලයන්ට එරෙහිව නීතිය දැඩිව ක්‍රියාත්මක කරන බවද කීය.
විශේෂයෙන් පෙළපාලි හා පෙරහර යාම් සහ රැස්වීම් පැවැත්වෙන ස්ථාන වීඩියෝ සහ ඡායාරූප ගතකොට ඒවාට සහභාගිවූ පුද්ගලයන් අත්අඩංගුවට ගැනීම් සිදුකරන බවද පොලිස් අධිකාරිවරයා පැවසීය.
මේ අතර පළාත් පාලන මැතිවරණය සම්බන්ධව නීතිය හා සාමය ආරක්ෂා කිරීම සඳහා පොලිස් නිලධාරින්, විශේෂ කාර්ය බළකාය සහ සිවිල් ආරක්ෂක සභිකයින් 65758 දෙනකු යෙදවා සිටින බවද පොලිස් අධිකාරි ගුණසේකර මහතා කීය.
මේ අතර මැතිවරණ පැමිණිලි සහ මැතිවරණ නීති උල්ලංඝනය කිරීම් සම්බන්ධව පොලිසිය මගින් අපේක්ෂකයින් 61 දෙනකු අත්අඩංගුවට ගෙන ඇති බවත් ඔවුන් අතරින් දූෂණ හා නීති විරෝධි ක්‍රියා සම්බන්ධව චෝදනා ලැබ සිටින අපේක්ෂකයින් අදාළ චෝදනාවලට වැරැදිකරු වුවහොත් ඔවුන් තේරීපත් වුවද මන්ත්‍රීධුරය අහිමිවිය හැකි බවද පොලිසිය පවසයි.
