(විනීතා එම්. ගමගේ)
මෙවර පළාත් පාලන මැතිවරණයේ අපේක්ෂකයන් අතරින් එකොළොස් දෙනෙකු මිනීමැරුම් චෝදනාවලට ලක්වූවන් යැයි පැෆරල් සංවිධානය කියයි. මෙම මිනීමැරුම් චෝදනා ලැබුවන් අතරින් දෙදෙනෙක්ම කොළඹ මහ නගර සභාවට තරග වදින්නේ යැයි ද එම සංවිධානය කියයි.
විවිධ අපරාධ චෝදනාවලට ලක්වූවන් 67 දෙනෙකු පිළිබඳ තොරතුරු තම සංවිධානය වෙත හෙළිවී ඇති බවත් මිනීමැරුම් චෝදනා ලැබූ 11 දෙනා ද ඇත්තේ ඒ අතර බවත් පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා ඉරිදා ලංකාදීපයට පැවැසීය.
කුඩු ජාවාරම්කරුවන් බවට චෝදනා ලැබූ තිදෙනෙක්ද පාතාලයට සම්බන්ධ පස්දෙනෙකුද අල්ලස්වලට සම්බන්ධ බවට චෝදනා ලැබූ තිදෙනෙක් ද ඒ අතර වෙන බවද හෙට්ටිආරච්චි මහතා සඳහන් කළේය. කසිප්පු ජාවාරම්කරුවන් 10 දෙනෙකු පිළිබඳවද තොරතුරු හෙළිකර ගෙන ඇතැයි පැවැසූ පැෆරල් විධායක අධ්‍යක්ෂවරයා මංකොල්ලකරුවන් දස දෙනෙකු පිළිබඳව ද තොරතුරු හෙළිවී ඇතැයි කීය.
මුදල් වංචා කළ 11 දෙනෙක්, පහරදීම්වට සම්බන්ධ අට දෙනෙක්, වැලි ජාවාරම්කරුවෙක්, ණය පැහැර හැරි පුද්ගලයෙක් මෙන්ම තමන් තරග කරන නගර සභාව සමඟ ගිවිසුම් පවතින පුද්ගලයෙක්ද මෙම පිරිස අතර සිටින්නේ යැයි ද හෙට්ටිආරච්චි මහතා ප්‍රකාශ කළේය.
මොවුන් පිළිබඳ තොරතුරු සියල්ල විමර්ශනය කොට ඇතැයිද ඒ පිළිබඳ තොරතුරු මැතිවරණ කොමිෂන් සභාව වෙත යවා ඇතැයි ද හෙතෙම සඳහන් කළේය.
මැතිවරණය අවසන වූ පසු ඔවුන් පිළිබඳ අධිකරණමය ක්‍රියාමාර්ග ගැනීමට පියවර ගන්නා බවත් එසේ වුවත් මොවුන් පිළිබඳ සොයා බලා අවංක හා දූෂණයෙන් තොර අපේක්ෂකයකුට ඡන්දය පාවිච්චි කිරීම ඡන්දදායකයන් සතු වගකීමක් බවත් හෙට්ටිආරච්චි මහතා අවධාරණය කළේය.
