(නිශාන්ත කුමාර බණ්ඩාර)
එක්සත් ජාතික පෙරමුණ විසින් ඉදිරි මැතිවරණ ඉලක්ක කරමින් හදන පුළුල් සන්ධානයට සිය පූර්ණ සහාය පළ කිරීමට ශ්‍රී ලංකා මුස්ලිම් කොංග්‍රසය තීරණය කර ඇතැයි දේශපාලන ආරංචි මාර්ග පවසයි.
එම පෙරමුණට සම්බන්ධ ශ්‍රී ලංකා මුස්ලිම් කොංග්‍රසය, කම්කරු ජාතික පෙරමුණ, කඳුරට ජනතා පෙරමුණ, ප්‍රජාතන්ත්‍රවාදී ජනතා පෙරමුණ, ජාතික හෙළ උරුමය සහ රිෂාඩ් බදුයුදීන් මහතාගේ මක්කල් කොංග්‍රසය සහ එක්සත් ජාතික පක්ෂයේ නායකයන් මෙම සන්ධානය සම්බන්ධයෙන් අවස්ථා කිහිපයකදී සාකච්ඡා කර ඇත.
සන්ධානයේ ලාංඡනය සහ සන්ධානයේ නම සම්බන්ධයෙන් තවදුරටත් සාකච්ඡා කෙරෙමින් පවතින බව ආරංචි මාර්ග පැවසීය.
කෙසේ වෙතත් සන්ධානයේ ජයග්‍රහණය සඳහා අවශ්‍ය සියලු සහයෝගය ලබා දීමට දැනටමත් මුස්ලිම් කොංග්‍රසය එකඟ වී ඇතැයි එම ආරංචි මාර්ග සඳහන් කරයි.
පවතින දේශපාලන අස්ථාවරය හමුවේ ප්‍රබල පුළුල් සංවිධානයක් හැටියට නව සන්ධානය ක්‍රියාකරනු ඇතැයි ශ්‍රී ලංකා මුස්ලිම් කොංග්‍රසය විශ්වාසය පළකර සිටිති.
