උතුරු පළාත් හිටපු මහ ඇමැති විග්නේෂ්වරන්
(නිශාන්ත කුමාර බණ්ඩාර)
ජිනීවා සමුළුවේදී ශ්‍රී ලංකාව විසින් එකඟ වූ කාරණාවලින් ඉවත් වීමට රජය උත්සාහ කළ ද එය සිතූ තරම් පහසු කටයුත්තක් නොවන බව උතුරු පළාත් හිටපු ප්‍රධාන අමාත්‍ය සී.වී. විග්නේෂ්වරන් මහතා පවසයි.
ත්‍රස්තවාදය මර්දන පනත අහෝසි කිරීම, උතුරු නැගෙනහිර අතුරදන්වූවන්ගේ ප්‍රශ්නයට විසඳුම් ලබාදීම, අතුරුදන් වූවන් පිළිබඳ සොයා බැලීමට කාර්යාලයක් පිහිටුවීම, එල්ටීටීඊ සැකකරුවන්ට නඩු පැවැරීම හෝ ඔවුන් නිදහස් කිරීම, දේශපාලන සිරකරුවන්ට සමාවදීම ඇතුළු කාරණා රැසකට ජිනීවා මානව හිමිකම් කොමිසමේදී ශ්‍රී ලංකාව එකඟවී තිබේ.
අතුරුදන්වූවන් සෙවීම සඳහා කාර්යාලයක් පිහිටුවීම පමණක් ඉටුකර ඇති අතර එය ද මේ වනවිට අකර්මන්‍යවී ඇතැයි විග්නේෂ්වරන් මහතා පැවැසීය.
සෙසු පොරොන්දු ඉටු කිරීමට ශ්‍රී ලංකා රජය අපොහොසත්වී තිබේ. එවැනි තත්ත්වයක් හමුවේ ජිනීවා සමුළුවට වූ පොරොන්දු ඉටු නොකොට එම යෝජනාවලින් බැහැරවීම කිසිසේත් අනුමත නොකරන බව ද ඔහු ප්‍රකාශ කළේය.
ශ්‍රී ලංකාව මෙවැනි තීරණයක් ගැනීම එය සෙසු රටවල් ද ආදර්ශයට ගන්නා නිසා එය සමුළුවේ දී වූ පොරොන්දු හෑල්ලුවට ලක්කිරීමක් බව විග්නේෂ්වරන් මහතා පෙන්වා දෙයි.
