(දයාසීලි ලියනගේ)
පලාගිය ත්‍රස්තවාදියකුට වෙඩි තැබීමෙන් මියයාම නිසා, ඔහුට වන්දි වශයෙන් ලක්‍ෂ 20ක මුදලක් ගෙවන ලෙසට අධිකරණයෙන් දෙන ලද තීන්දුවට අනුව මිය ගිය පුද්ගලයකුගේ ජීවිතයක වටිනාකම ලක්‍ෂ 20ක් ලෙසට නියම වී ඇති හෙයින් ගංවතුරින් හා නායයාම්වලින් මියගිය අයට අඩු වශයෙන් රුපියල් ලක්‍ෂ 10 බැගින්වත් ගෙවිය යුතු බව ඒකාබද්ධ විපක්‍ෂය රජයෙන් ඉල්ලීමක් කරයි.

ත්‍රස්තවාදී නොවන රටේ අහිංසක ජනතාව මෙම විපතින් ජීවිතක්‍ෂයට පත්වී සිටින 300ක පමණ වූ පිරිසට රුපියල් ලක්‍ෂය බැගින් වන්දි ගෙවීම කිසිසේත් ප්‍රමාණවත් නොවන බව ඒකාබද්ධ විපක්‍ෂයේ පාර්ලිමේන්තු මන්ත්‍රී බන්දුල ගුණවර්ධන මහතා කීය.

චීනයෙන් මෙම අනාථ වූ පිරිසට රුපියල් මිලියන 400ක මුදලක් ලබාදී ඇති නිසා රජයට බරක් නොවන සේ මියගිය අයට රුපියල් ලක්‍ෂ 10 බැගින් වන්දි ගෙවීමට පහසුවෙන්ම අවස්ථාව ලැබී ඇති බවද ඔහු ප්‍රකාශ කළේය. හානිවූ අයට නිවාස ඉදිකිරීම සඳහා අයවැයෙන් වෙන් කළ මුදල් නිවාස ඇමැති සජිත් ප්‍රේමදාස මහතාට ලබාදීමෙන් ඔහු එම නිවාස ඉදිකර පෙන්වනු ඇතැයි ද ඔහු කීය.

මීට අමතරව ගංවතුර හා නයයාම්වලින් විනාශ වූ ව්‍යාපාර යළි නගාසිටුවීම සඳහා බිලියන 2ක ණය මුදලක් ලබාදීමට රජය තීරණය කර ඇති අතර, පොලී නොමැතිව මෙම ණය මුදල් ලබාදිය යුතු බවද ඒකාබද්ධ විපක්‍ෂය රජයට යෝජනා ඉදිරිපත් කර සිටී.