(මහින්ද නිශ්ශංක) 
පළාත් පාලන ආයතන 341ක් සඳහා ලබන 10 දා පැවැත්වෙන මැතිවරණයේ සියලු ප්‍රචාරක කටයුතු ලබන 7දා මධ්‍යම රාත්‍රියෙන් අවසන් කෙරෙන බව මැතිවරණ කොමිෂන් සභාව පවසයි.

ඒ අනුව ඡන්ද ප්‍රචාරක රැස්වීම් මෙන්ම ඡන්දය ඉල්ලා ගෙන්ගෙට යාම, විද්‍යුත් හා මුද්‍රිත මාධ්‍ය ඔස්සේ සහ සමාජ වෙබ් අඩවි හරහා ප්‍රචාරය ඇතුළු සියලු ප්‍රචාරයන් සම්පූර්ණයෙන්ම තහනම් බව අතිරේක මැතිවරණ කොමසාරිස් එම්.එම්. මොහොමඩ් මහතා පැවැසීය. 

පළාත් පාලන ආයතන 1,341ක් සඳහා නියෝජිතයන් 8356 දෙනකු තෝරාපත් කර ගැනීමට පැවැත්වෙන මෙවර මැතිවරණයට දේශපාලන පක්ෂ 43කින් ස්වාධින කණ්ඩායම් 272කින් අපේක්ෂක අපේක්ෂිකාවන් 57252ක් තරග වදින බවද මැතිවරණ කොමිෂන් සභාව පවසයි. 

ලබන 10 දා පෙ.ව. 7.00 සිට ප.ව. 4.00 දක්වා මධ්‍යස්ථාන 13400කදී පමණ ඡන්දය පැවැත්වෙන අතර 2017 ඡන්දහිමි නාමලේඛනයට අනුව ඡන්දය ප්‍රකාශ කිරීම සඳහා ඡන්දදායකයන් 15760867 දෙනකු ලියාපදිංචිව සිටින බවද මැතිවරණ කොමිසම පවසයි. 

මෙම පළාත් පාලන ඡන්ද විමසීමේ ඡන්ද ගණන් කිරීම මධ්‍යස්ථාන 13400කදී සිදුකිරීමට මැතිවරණ කොමිසම සැළසුම් කර අැත. 

මෙවර මැතිවරණයේදී තැපැල් ඡන්ද ප්‍රකාශ කිරීම සඳහා 560020 දෙනකු සුදුසුකම් ලබා සිටි අතර තැපැල් ඡන්ද ප්‍රකාශ කිරීමට දින 5ක් වෙන්කර තිබුණි.