(අජන්ත කුමාර අගලකඩ)
අමාත්‍යාංශ විෂය පථය ගැසට් කිරීමේදී රජයේ මාධ්‍ය ආයතන දෙකක් ජනාධිපතිවරයා යටතේ තබාගැනීමේ සූදානමක් පවතින බව රජයේ ආරංචි මාර්ග කියයි.
මංගල සමරවීර මහතා මුදල් හා ජනමාධ්‍ය ඇමැති ලෙස දිවුරුම්දීමත් සමග ජාතික රූපවාහිනියේ, ස්වාධීන රූපවාහිනී සේවයේ හා ලේක්හවුස් ආයතනයේ ඔක්තෝබර් 26 වැනිදාට පෙර සිටි සභාපතිවරුන්ට නැවත සිය ධුරවල කටයුතු කරන ලෙස මංගල සමරවීර ඇමැතිවරයා උපදෙස් දී තිබූ බව වාර්තාවේ.
ලේක්හවුස් ආයතනයේ සභාපතිවරයා හැර අනෙක් රාජ්‍ය මාධ්‍ය ආයතන දෙකේ සභාපතිවරුන්ට විෂය ගැසට් පත්‍රය නිකුත් කරන තෙක් වැඩබාර නොගන්නා ලෙසත් දැනට එම ආයතන දෙකේ කටයුතු කරන සභාපතිවරුන්ට සුපුරුදු පරිදි රාජකාරි කටයුතු කරන ලෙසත් ජනාධිපතිවරයාගේ පාර්ශ්වයෙන් දැනුම් දී ඇතැයි ද දැනගන්නට තිබේ.
අලුතින් දිවුරුම් දෙන ලද ඇමැතිවරුන්ගේ විෂය පථය ඇතුළත් ගැසට් නිවේදනය ජනාධිපති මෛත්‍රීපාල සිරිසේන මහතා විසින් ලබන සඳුදා නිකුත් කෙරෙනු ඇතැයි ද වාර්තාවේ.
