(ටෝනි කරුණානායක සහ තරිඳු ජයවර්ධන)
ගම්පහ, රතුපස්වල පිරිසිදු පානීය ජලය ඉල්ලූ ගම්වාසීන්ට වෙඩි තබා තිදෙනකු මරාදැමීමේ සිද්ධියට සැකපිට රහස් පොලිසියෙන් අත්අඩංගුවට ගත් යුද හමුදා සාමාජිකයන් තුන් දෙනෙක් ගම්පහ වැඩබලන මහේස්ත්‍රාත් වසන්තා ගුණසේකර මහත්මිය විසින් අප්‍රේල් තුන්වැනිදා තෙක් රිමාන්ඞ් කරනු ලැබුවාය.
එලෙස රිමාන්ඞ් බාරයට පත් කරනු ලැබුවේ ශ්‍රී ලංකා යුද හමුදාවේ සේවා බළකායේ මාණ්ඩලික සැරයන්වරයකු සහ පාබල හමුදාවේ සැරයන්වරයකු සහ කෝප්‍රල්වරයෙකි.
අත්අඩංගුවට ගත් සැකකරුවන් තිදෙනා විසින් රැගෙන එනු ලැබූ ටී 56 ගිනි අවි සහ අපරාධය සිදුවූ ස්ථානයේ තිබූ හිස් උණ්ඩ කොපු කිහිපයක් සැසඳෙන බව රජයේ රස පරීක්ෂක දන්වා ඇතැයි සැකකරුවන්
තිදෙනා අධිකරණයට ඉදිරිපත් කරමින් අපරාධ පරීක්ෂණ දෙපාර්තමේන්තුවේ විශේෂ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක රංජිත් මුණසිංහ මහතා පැවසීය.
වැලිවේරියේ, රතුපස්වල ජල ප්‍රශ්නයකට විසඳුම් ඉල්ලා පැවැති උද්ඝෝෂණයකට 2013 අගොස්තු පළමු වැනිදා වැලිවේරිය නගරයේදී යුද හමුදාවෙන් වෙඩි තැබීමෙන් සහ පහරදීමෙන් තිදෙනෙක් මියගොස් 50කට ආසන්න පිරිසක් තුවාල ලැබූහ.
රමිල රවිශාන් පෙරේරා සහ අඛිල දිනේෂ් යන පාසල් සිසුන් දෙදෙනා වෙඩි වැදී මිය ගිය අතර නිලන්ත පුෂ්පකුමාර පහරදීමකින් වූ තුවාල නිසා මියගොස් ඇතැයි රහස් පොලිසිය මීට පෙර අධිකරණයට දන්වා තිබිණි.
මිනීමැරීම සහ මිනීමැරීමට තැත් කිරීම යන චෝදනා යටතේ සැකකරුවන් අත්අඩංගුවට ගත් බව රහස් පොලිසිය අධිකරණයට දැන්වීය. සැකකරුවන් තිදෙනා වෙනුවෙන් පෙනීසිටි නීතීඥ සංජලා වන්නිආරච්චි මෙනවිය පවසා සිටියේ කලබලය වූ ස්ථානයේ පොලිසියටත් තත්ත්වය පාලනය කර ගැනීමට නොහැකි වූ බවයි. මෙම නිලධාරීන් එම අවස්ථාවේ අහසට වෙඩි තැබුවාදැයි සැකයක් ඇතැයි නීතීඥවරිය කීවාය.
