දයාසීලි ලියනගේ
ජාතික සමගි සන්ධානයේ ‘හෙලිකොප්ටර්’ ලාංඡනයෙන් පළාත් පාලන මැතිවරණයට ඉදිරිපත් කිරීමට සූදානමින් සිටි ශ්‍රී ලංකා නිදහස් පක්ෂය දිස්ත්‍රික්ක 16ක සියලු පළාත් පාලන ආයතන සඳහා ‘අත’ ලකුණින් නාමයෝජනා භාර දුන්නේ නීතිමය ප්‍රශ්නයක් හේතුවෙන් බව දැන ගන්නට ඇත.
ඉතිරි දිස්ත්‍රික්කවල ආයතන කීපයකට ද තනිව තරග කරන එම පක්ෂය අනෙකුත් ආයතන සඳහා ‘හෙලිකොප්ටරය’ ලාංඡනයෙන් මැතිවරණයට ඉදිරිපත් වන බව එම පක්ෂයේ ජ්‍යෙෂ්ඨ ප්‍රකාශකයෙක් කීය. මැතිවරණ කොමිසම සන්ධානයේ ලේකම් ලෙස ශ්‍රී ලංකා නිදහස් පක්ෂයේ ලේකම්වරයා පිළි නොගන්නා නිසා මැතිවරණයේ දී ලැබෙන බෝනස් ආසන සඳහා සිදුවන අවාසිය මඟහරවා ගැනීමටත් පාක්ෂිකයන්ගේ ඉල්ලීම නිසාත් ආයතන ගණනාවකට වෙනම තරග කිරීමට තීරණය කළ බව ද ඔහු කීය.
මේ අතර ශ්‍රී ලංකා නිදහස් පක්ෂයේ රජයට සම්බන්ධ කණ්ඩායමේ දේශපාලනඥයන් පළාත් පාලන මැතිවරණයේ ඇතැම් ආයතන සඳහා ස්වාධීන කණ්ඩායම් ඉදිරිපත් කර ඇති බව දේශපාලන ආරංචි මාර්ග සඳහන් කරයි. පසුගිය දින කීපයේ දී මේ සඳහා පුද්ගලයන් තේරීමේ කටයුතු සිදුවූ බව වාර්තා වේ.
